Eptu party 12-ten PM hnenah joint letter thawn

Eptu party lian 12-te chuan prime minister Narendra Modi hnenah joint letter thawnin, ram chhunga hri leng thawh hnihna thleng meka sorkar hmalakna tura an thil phut hrang hrangte an tarlang.

Eptute chuan sorkar laipui chuan hri kai an pun chak avanga damdawi-in hrang hranga indaih lohna nasa tak thleng a, mi sang tel an thih belh zel chungchangah sorkar laipui chu chak zawka hma la tura an phutte an tarlang, hei bakah hian a thlawna Covid vaccine sem tur te, Central Vista project thawh mek titawp tur leh loneitute pawl hrang hrangin an dodal farm law siam thar sut turtein an phut tih an sawi.

PM hnenan lehkha an thawnah hian a hma pawhin party mal leh a rual ang pawhin sorkar laipui hmalakna tura an duh hrang hrangte an lo hrilh fo tawh tih an sawi a,"Mahse vanduaithlak takin i kaihhruai sorkar chuan kan ngenna leh rawtna siamte hi a ngaihthahin, a bawhzui duh lo a ni. Hei vang hian tuna dinhmun rapthlak tak hi a thlen phah ta hial a ni," an ti.

Joint letter-a an thil phut an tarlante chu -

- Sorkar laipui chuan a theih dan kawng hrang hrang, ram chhung leh ram pawn aṭang pawhin vaccine hi a tam thei ang neih tum rawh se.
- A thlawnin vaccination campaign kalpui ṭan nghal ni rawh se.
- Ramchhungah vaccine tam zawk siam chhuah phalna pek ni rawh se.
- Vaccine tana budget dah Rs vbc 35,000 chu hman ni rawh se.
- Central Vista pro­ject thawh mek chu titawpin, hemi atana sum dah hi oxygen leh vaccine leina atan hman ni rawh se
- PM CARES-a sumte chu vaccine, oxygen leh damdawi hmanraw mamawh dang leina atan hman ni rawh se.
- Hna nei lote hnenah thla tin Rs 6,000 pek ni rawh se.
- A mamawhte hnenah a thlawnin buhfai leh chaw lam sem ni rawh se.
- Loneitute ven­himna atan farm law-sut ni rawh se.