Oxygen supply a let thumin pung tawh

Prime minister Narendra Modi hoa Nilainia high level meeting neihah Covid-19 hri len tirh aiin oxygen supply chu a let thumin tihpun a ni tawh a, Remdesivir siamchhuah pawh tihpun niin, sorkar laipui chuan damdawi siamtute chu an damdawi siam tichangtlung chho zel tura puih a inhuam thu sawi a ni.

PM Modi hnenah Remdesivir siamchhuah pawh kar liamta chhung khan nasa taka tihpun thu hrilh a ni a, state tinte hnenah damdawi ṭhahnem tak thawn chhuak bawkin sorkar laipui vilna hnuaiah manufacturer-te mamawhna zawnah puih an inhuam thu an tarlang.

Prime Minister Office chuan Nilaini khan Covid-19 hri leng thawh khatna hluar hun lai ai khan oxygen supply chu a let thum aia tamin a pun belh tawh a, sorkar chuan Covid leh mucormycosis enkawlna atana damdawi semchhuahte pawh uluk taka a vil thu a sawi.

Modi chuan "India hian pharma sector changtlung tak kan nei a, sorkar nena thawhdunna ṭha kan neih chuan damdawi awlsam takin kan nei thei zel dawn a ni" tiin a sawi. PM chuan Oxygen Express operation leh IAF thlawhtheihna hman a nih dan chungchang pawh a sawilang a, oxygen concentrator, oxygen cylinder leh PSA plant pawh ramchhung hmun hrang hrangah bunfel a nih tawh thu a sawi a ni.