India ramah hri kai thar nuai 3.62 Hri vanga thi 4,120 an awm belh

India rama Covid-19 hri kai hmuhchhuah tawh vaibelchhe 2.37 awmin, Nilaini khan hmuhchhuah thar mi nuai 3.62 an awm a, mi 4,120 in nunna an chan belh leh bawk. Hripui vanga thi hi mi 2,58,317 an tling tawh.

Ramchhunga hri kai hmuh chhuah tawh aṭangin hri kai mek, active case 15.84% an awm. India rama hri kai mek zinga 82.51% chu Karnataka, Maharastra, Kerala leh Tamil Nadu-a mite an nih thu union health ministry chuan a tarlang.

India ramah Covid-19 heti taka a ṭaidarhna chhan chu sakhaw intawhkhawmna leh politics vanga mipui punkhawmna a tam lutuk vang niin World Health Organisation (WHO) chuan a sawi.

South-East Asia huamchhunga hri kai hmuhchhuah zinga 95% leh hri vanga thihna 93% chu India rama thleng a ni. Khawvel pum huapa hri hri kai hmuhchhuah zinga 50% leh thihpui 30% chu India rama mi an ni tih global health body chuan a sawi bawk.

India ramah January 16 aṭangin Covid vaccine pek chhuah ṭan ni mah se, a ram mipui zinga 2.5% bak vaccine bikima pek an la ni lo. Health Ministry tarlan danin India rama vaccine semchhuah tawh chu Nilaini thleng khan dose vaibelchhe 17.70 a ni.

State ṭhenkhat chuan vaccine indaihlohna an tawh mek thu an sawi a, state tam zawkin May 1 aṭanga kum 18-44 inkar tana vaccine pek tura tih chu an la kalpui thei lo. Karnataka chuan kum 18-44 inkar tana Covid-19 vaccine semchhuah mek pawh vawiin aṭangin a titawp dawn. Telangana chuan sorkar laipui hnenah vaccine dose nuai 13 - Covishield dose nuai 10 leh Covaxin dose nuai 3 pe chhuak thuai turin a ngen.

Vaccine indaihlohna vangin Serum Institute leh Bharat Biotech te chuan August ral hmain an vaccine siam chhuah chu dose nuai 10 leh vaibelchhe 7.8 ah tihpun an inbeisei thu sorkar laipui an hrilh.

Bihar leh Uttar Pradesh khawchhak lama Covid vanga thi nia hriatte ruang eng emaw zat tuipuia paih hmuh a nih hnuah, UP-a Unnao district, Lucknow khawpui bula km 40 a hlaah mithhi ruang ṭhanhnem tak hmuh a ni leh bawk.

Nilaini khan West Bengal ah ni khata hri kai hmuhchhuah tam ber ni a thleng leh a, Covid-19 kai thar 20,377 an awm. Hri len tirh aṭangin mi nuai 10.53 chuang hri kai an awm tawh tih an state health department chuan a sawi.