India : Central Vista Redevelopment Project

India ramah Covid-19 hri pui leng thawh hnihna thleng mek avangin damdawi-in leh healthcare facility hrang hrang an lun hle a, dam lo enkawlna atana mamawh oxygen leh damdawi lam hmanrua dang indaih lohna avangin ram pumah harsatna a thleng mek. Hetiang boruak kara sorkar laipuiin project lian tham tak, Central Vista project a thawh mek chuan sawisel a rawn hlawh chho leh a, eptu party hrang hrang leh political leader-ten na tak takin BJP kaihhruai sorkar beihna atan an hmang zui a ni. He project thawhna atana sum ruahman chu vaccine leh hri kai enkawlna atana mamawh leina atan te, health infrastructure tihchangtlunna atana hmang turin sorkar an phut.

Central Vista project hi politician-te bakah environmentalist-ten climate kaihhnawih thil avangin an dodal bawk a, tun hnaiah he project thawh mek titawp tura sorkar ngenna thawm a awm reng a ni.

He project thawh mek sawiselna leh titawp tura phutna a tam chhoh tak zel avangin ngaihven pawh a hlawh phah lehzual a, hei vang hian Central Public Works Department chuan India Gate bulah hna thawhna hmunah thlalak leh video recording a khap zui nghal.

Central Vista Redevelopment Project hi eng nge?
Centre-a prime minister Narendra Modi kaihhruai NDA sorkarin project lian tham tak a siam a ni.

He project hi kum 1030 chhoa British awpna hnuaia India a awm laia Lytiyen Delhi-a km 3.2-a thui Central Vista tia an sawi thuam ṭhatna tur a ni. Project hian Central Vista tih huam chhunga sorkar building tam tak ding mekte ṭhiaha sak tharte bakah Parliament thar sakna turte a huam tel.

Kum 2019 khan sorkar laipui chuan India ram 'power corridor' a nihna thar lanna turin project hi siam a ni thu a puang a ni. Parliament building thar bakah prime minister leh vice president chenna in tur te, sorkar minitry leh department zawng zawng dah theihna tur bulding block 10 sak telna turte pawh ruahmannaah hian telh a ni.

Project hi hi kum 2024-a zawhfel hman tura duan a ni.

Project estimated cost eng zat nge?
Central Vista Redevelopment Project thawhna atan hian cheng vaibelchhe 20,000 ruahman a ni. Heng aṭanga cheng vaibelchhe 1,000 chu Parliament Building thar sakna bik atan tih a ni.

Parliament Building thar kan mamawh reng em?
Parliament building hman mek hi British hoin an sak niin, kum 93 dawna upa a ni tawh. Union ministry of housing and urban affairs chuan a building hi a hlui tawh avangin a kum telin a quality pawh a chhe ve zel a, hei vang hian a himna lam pawh a ngaihtuahawm tawh niin a sawi.

Central Vista Project hnuaiah hian Prime Minister chenna in chu Prime Minister's Office (PMO) awmna, South Block bul hnaiah sak a ni ang. Vice President in pawh North Block hnaihah dah a ni tawh dawn a ni. North leh South Block-te hi Rashtrapati Bhavan chhim leh hmar lama awm an nih avanga he hming hi puttir an ni.

Ruahmanna an siamah hian North leh South Block hluite chu museum-ah leh an ni thung dawn a ni.

Tu in nge project hi thawk?
Kum 2019 September thla khan Parliament buildng thar sakna tura tender tihchhuah chu Tata Projects-in Rs vaibelchhe 861.90-a chhangin a chang. Rs vaibelchhe 865-a chhangtu, L&T aiin thlan a ni.

Sorkar laipui chuan kum 2019, October thla khan building thar sak tura desinger tur pawh a tifel a, Ahmedabad-a architecture copany HCP chu Parliament building thar design tur hian thlan an ni.

Highlights -
- Parliament Building Complex pianhmang hi kil thum nei a ni dawn a, square meter 64,500-a zau a awh ang.
- Parliament building hman lai aiin a lian dawn a, Member of Parliament 1,224-te an awm khawm thei vek tawh ang.
- Lok Sabha chamber-ah seating capatiy 888 siam a ni dawn a, Rajya Sabha chamber-ah 384 a awm ang. Tunah hian Lok Sabha-ah hian MP 545 leh Rajya Sabha-ah 245 an awm mek.
- Building tharah hian MP zawng zawngten office hran an nei vek dawn.
- Parliament building tharah hian Constitution Hall puitham tak siam a ni dawn a, he hmunah hian India ram rohlu tak takte pholan a ni dawn a, Constitution original copy pawh pholan a ni dawn.
- Visitors' gallery siam a ni dawn a, hetah hian digital hmangin India rohlute tihlan a ni ang.
- Parliament building hlui chu chei ṭhain, a ṭul huna hman theih turin ruahman a ni ang.
- Paperless office-a siam tuma hmalakna kawng khat atan Parliament building thar hi digital interface thar ber hmangin thuam a ni ang.
- Building thar sak hna hi enpui tur hian monitoring committee din a ni a, hetah hian Lok Sabha Secretariat, Ministry of Housing and Urban Affairs, CPWD, NDMC leh project archichect/designer aṭangin member dah an ni.
- Parliament building thar bik hi kum 2022-a zawhfel tum a ni.
- Central Vista Project pum hi kum 2024 ah zawh tum a ni a, hei hi Lok Sabha inthlanpui neih kum tur a ni.