India-ah ni khatah hri kai aia enkawl dam tam ni thleng

India ramah Ningani khan hri kai thar mi 3,43,144 awmin, hemi ni vek hian hri kai enkawl dam mi 3,44,776 an awm bawk. Hun rei tak hnuah ni khata hri kai thar aia dam an tam zawk ni a thleng ve ta a ni.

Union health ministry chuan hri kai thar an tlahniam ve hret hret niin a sawi a, ram pumah hri kai hmuh chhuah tawh hi 2,40,46,809 an tling tawh.

Ram pum huapa hri kai thar an tlakhniam ṭan laiin state leh UT pakua - Kerala, Odisha, Punjab, Himachal Pradesh, West Bengal, Tamil Nadu, Puducherry, Assam leh Manipur-ah chuan hri kai hmuhchhuah hi nitin an la pun belh zel thung.

Hetihlai hian, state/UT pakua dang - Chhattisgarh, Madhya Pradesh, Jharkhand, Goa, Chandigarh, Uttarakhand, Jammu and Kashmir leh Ladakh-ah chuan kar liam ta aṭang khan hri kai zat hian ziaawm lam an pan a ni..

India ram pumah sample 31,13,24,100 test ni tawhin, chung zinga sample 18,75,515 chu Ningani bika test an nih thu Indian Council of Medical Research (ICMR) chuan a sawi.

India rama vaccine semchhuah dan
Ramchhungah Covid-19 vaccine dose 17,92,98,584 pekchhuah a ni tawh.

Hetih lai hian state tam tak chuan vaccine indaih loh vangin rampawn aṭanga lakluh dan kawng an dap mek. Chief Minister ṭhenkhat ten Prime Minister hnenah vaccine siamchhuah kawngah darhzau zawka pechhuak turin ngenna an thawn bawk.

January 16 aṭang khan ram pum huapin vaccine pek chhuah ṭan a ni a, Delhi-a healthcare worker Manish Kumar chuan a dawng hmasa ber. Frontline worker-te tan February 2 aṭanga pekchhuah ṭan an ni. March 1-ah kum 60 chunglam leh kum 45 chin, natna benvawn neite tan pek chhuah a ni a, April 1 aṭangin kum 45 chunglam tan pek chhuah leh a ni.

Vaccine pekchhuah thawhthumna May 1 aṭanga kum 18-44 inkar tana zau zawk leh chak zawka pekchhuah tum chu vaccine indaihlohna vangin kalpui hleih theih a la ni lo.

Vaccine siamtute puih inhuam
Sorkar laipui chuan vaccine siamtu company-ten chak zawka an siamchhuah theihna atana puih a inhuam thu Ningani khan a sawi.

Bharat Biotech chuan vaccine tam zawk siamchhuah a nih theihna atan, Covaxin siam dan kawnghmangte chu manufacturer dang hnena hrilh a remti tawh bawk. Company dangten an siam ve theih chuan vaccine indaih lohna pawh nasa takin a phuhruk chhoh theih beisei a ni. NITI Aayog member VK Paul chuan Covaxin siam duh company-te chu thawk ho tura chahin, sorkar laipui pawhin a theih angin a pui dawn a ni, a ti.