Vaccine lak inkar tihhlat rawtna sorkarin pawm

Sorkar laipui chuan Covid working group-in Covishield vaccine dose khat leh hnihna lak inkar tihla tura rawtna a siam chu a pawm. A hmaa vaccine lak inkar, kar 6-8 tura tih chu he rawtna ang hian kar 12-16-ah tihhlat a ni.

Covid working group chairman NK Arora chuan vaccine lak hun inkar tihhlat hi vaccine indaih loh vang nia sawi thawmte a awm a, hei hi thu dik lo a ni tih sawiin, zirchianna aṭangin vaccine lak inkar tihhlat hian hri laka a venna kawngah hna an thawk chak thei zawk dawn tih hriat a ni, a ti.

Covaxin dose lak hun inkar erawh tihdanglam a ni lo. Covaxin hi dose khatna lak aṭanga ni 28-42 chhungin a dose hnihna lak tura tih a ni.

National Technical Advisory Group on Immunization (NTAGI) member, Dr Arora chuan, "Vaccine indaih loh vang ni se, thla khata tihhlat hian eng nge danglamna a siam vak ang? Vaccine indaih lohna a phuhru hman dawn lo. A kar tihhlat hi damdawi hnathawh a ṭhat zawk dawn vang a ni," tiin a sawi.

Zirchianna aṭangin, Covishield dose lak inkar hi kar 12-16 a tihhlat a nih chuan, hri kai tur laka a ven theihna hi 65% aṭangin 88% a kai chho thei tih scientific data aṭangin hriat a ni tih a sawi. Hemi rual hian a hmaa lo kalpui tawh anga dose khatna lak aṭanga kar thum, thla khat hnua dose hnihna late tan pawh hlauhthawn tur a awm lo tih Dr Arora chuan a sawi nghal bawk.

NTAGI chuan Covid-19 positive-te chu enkawl dam an nih hnuah pawh, hri an kai tawh lo tih hriat a nih aṭanga thla ruk hnuah vaccine hi la turin an duh tih an tarlang.