Chhattisgarh-in a tender chhuah cancel

Chhattisgarh sorkar chuan Assembly building thar sakna tur tender a tihchhuah chu cancel-in, minister chenna in turte leh MLA hostel a sak mek pawh a titawp. Hei hi hri dona atana state-in a sum neih angte hman a ṭul vang tih a sawi.

Chief minister Bhupesh Baghel chuan state mipuite himna chu an ngaih pawimawh ber a ni tih sawiin, hri len hmain Assembly building thar sakna tur lungphum a ni tawh a, Raj Bhavan, chief minister residence, minister-te in tur leh MLA hostel bakah circuit house thar tur chu sak hna ṭan a lo ni tawh bawk a ni, a ti. Mahse hri leng avangin hri dona kawnga sum tam zawk mamawh a ni a, inrenchemna kalpui a ngai tih sawiin, Congress hruaitu chuan heng hna thawk mekte pawh tihtawp vek a ni tih a sawi.

CM chuan, "Kan sum neihte chu hri dona atan, hri leng vanga harsatna tawk mekte chhawmdawlna atan dah hmasak a ni ang. Hetianga ram pumin dinhmun harsa tak a hmachhawn laiin kan sum leh thil neih dangte building thar sakna atan ringawt kan hmang thei lo a ni," a ti.