India ramah hri kai thar nuai 3.11, thihpui 4,077 an awm

India ramah Inrinni liam ta khan hri kai hmuh chhuah thar nuai 3.11 an awm a, hri kai hmuhchhuah tawh hi vaibelchhe 2.46 an awm tawh. Hemi ni vek hian hri thihpui 4,077 awm lehin, nunna chan tawh zawng zawng nuai 2.7 an tling tawh bawk.

April 5 aṭang khan India ramah hri kai hmuhchhuah thar nitin mi nuai khat chuang awm ziahin, tun hnaiah hri kai hi tlahniam deuh mah se ni sawm liam ta chhung ringawt khan nuai 40 chuang hmuhchhuah an ni.

Prime minister Narendra Modi hoin Inrinni khan India rama Covid-19 dinhmun thlir hona, high-level meeting an nei. Covid-19 test neih zat pawh pung zelin, March thla khan kartin nuai 50 vel test ṭhin chu vaibelchhe 1.3-ah a pung chho tawh.

PM chuan positivity rate sanna state ah 'localised containment strategies' kalpui tura chahin, thingtlang kilkhawra medical oxygen thawn tur leh vaccine semchhuah chak zawka kalpui turin a ngen.

West Bengal chuan kar hnih awh tur lockdown an puang. Office leh zirna in zawng zawng khar tura thupek niin, emergency services chiah chhuah phal an ni. Inrinni khan an state-ah hri vangin mi 144 an thi a, hei hi nikhata thi tam ber ṭum a ni.

Delhi chief minister Arvind Kejriwal chuan district tinah oxygen concentrator bank bun fel a ni tawh tih a sawi. Special team-te chuan hri kai, mahni ina inenkawl tan oxygen concentrator pe turin ruahmanna an siam. Delhi-ah darkar 24 liamta chhungin hri kai 6,500 awm belhin, thla tam tak liam hnua a tlem ber ṭum a ni.

Maharashtra-ah chuan hri lengin ziaawm lam panin, nimin khan hri vanga thi 960 an awm. Hri leng an thunun hneh em avanga fak hlawh, Mumbai khawpuiah chuan hri kai thar 1,447 an awm.

Punjab-ah ni 44 liamta chhunga mitthi zinga 40% chu Covid kaihhnawih vanga thi an ni. Punjab-ah hian hri vanga thi 11,000 awmin, Ludhiana chu hri leng tuar na ber district a ni.

Kashmir-a coronavirus vaccine sem chu tihtawp lailawk niin, district ṭhenkhat ah chuan vaccine la semchhuah a la ni ve lo. State tam tak chuan vaccine a kawlsa a tlem tawh thu an sawi a,hetihlai hian sorkar laipui chuan kumtawp hmain dose vaibelchhe 200 sem turin ruahmanna a siam.

Russia siam Sputnik V Covid-19 vaccine chuan Zirtawpni khan India a rawn thleng a, a dang pawh a rawn thlen belh thuai beisei a ni. India rama vaccine pathumna tur niin, Bharat Biotech Covaxin leh Serum Institute Covaxin te nen hman an ni ang.