Cyclone Tauktae-in Goa a thleng

Cyclone Tauktae chuan nimin khan India ram hmarthlang lam panin chawhnu lamah khan Goa leh a chhehvel a nuai.

Goa-ah chuan ruahsur a nasat bakah thli a na hle a, tuifawn pawh a nasa hle a, hmun tam takah power supply a tihchhia niin state Power Minister Nilesh Cabral chuan a sawi.

India Meteorological Department (IMD) chuan tukin zing lam thleng hi chuan Goa leh a chhehvel hi a la nuai dawn nia a lan thu nimin tlaiah khan an sawi a, Daman and Diu bakah Dadra and Nagar Haveli lam pana a kal dawn thu leh naktuk zing lamah hi chuan Gujarat tuipui kam lam a thlen an rin thu an sawi bawk.

Cyclone Tauktae tleh avang hian Kerala leh Karnataka bakah Maharsahtra hmun ṭhenkhatah chuan ruah a na hle a, Kerala-ah phei chuan mi pahnihin an thih phah nia tarlan a ni. Zirtawpni aṭang khan Kerala hi an buai ṭan tawh a, thing tlu, tuilian leh power chhia an state chhungah a tam hle. Sorkar pawhin hmun him lamah mi za chuang a sawn chhuah phah a ni.

Thlipui tuarte ṭanpui tur hian Indian Air Force leh National Disaster Response Force (NDRF)-te chu nasa takin an inbuatsaih lawksa bawk a, IAF chuan transport aircraft 16 leh helicopter 18 hman mai theihin an peih sa nghe nghe.