Delhi sorkarin Civic Body hnathawkte tan Rs Vbc 1,051 a pe chhuak dawn
Delhi sorkar chuan Inrinni khan municipal corporation pathum tan healthcare worker-te leh a hnathawk dangte hlawh tur Rs Vaibelchhe 1,051 a pek dawn thu a puang.
Deputy chief minister Manish Sisodia chuan virtual-a hemi chungchang a sawinaah lockdown avangin hun khirh tak tawk mah se, chief minister Arvind Kejriwal chuan hripui leng doa hna thawktute chuan an hlawh an la tur a ni, tiin thutlukna a siam a ni, a ti.
Aam Aadmi Party leader chuan doctor leh civic body hnuaia hnathawkte chuan municipal corporation-a remruatna fel lo leh eirukna avangin hlawh an la thei lo niin a sawi. Delhi-a municipal corporation pathum- South Delhi Municipal Corporation, East Delhi Municipal Corporation leh North Delhi Municipal Corporation-te chu BJP kaihhruaina hnuaiah an awm vek a ni.
East corporation chuan Rs Vbc 367 an dawng dawn a, North corporation-in Rs vbc 432 an dawng ang a, South Corporation-in Rs Vbc 251 an dawng thung ang.
Hetihlai hian North Delhi Mayor Jai Prakash chuan corporation pathumte'n an nawr hnuah Delhi sorkar chuan sum chu an pechhuak dawn chuah niin a sawi ve thung a, civic body pathumte chuan Chief Minister leh Lt governor hnenah ziakin dilna lehkha vawi eng emaw zat an thawn tih a sawi.
Delhi-ah hian nimin sorkar report tihchhuah thleng khan Covid-19 hripui kai mi 13,87,411 an awm tawh a, chung zinga 12,99,872 chu dam leh tawhin 21,244-in an thihpui tawh a ni. Nimin report-ah chuan hri kai hmuh chhuah thar 6,430 an awm leh a, hri kai mek 66,295 awmin dama puan mi 11,592 an awm. Mi 337 lai darkar 24 chhungin hripui vangin an thi leh bawk.