Covid-19 hri kai thar nuai 3 aiin tlem ta

India ramah April 21 hnua a ṭum khatna atan ni khata hri kai hmuh chhuah thar chu nuai thum aiin an tlem ve ta. Pathianni khan ram pumah hri kai thar mi nuai 2.7 awmin, Covid vanga thi 4,106 an awm bawk.

April 28 aṭang khan ni khatah Covid vanga thi mi 3,000 chuang an awm ziah a, mi nuai 2.7 in nunna an chan tawh a ni. Nimin zing thleng khan hri kai hmuh chhuah thar, positivity rate chu 17.88% a la ni.

January aṭanga kalpui ṭan, khawvela vaccine semchhuahna lian ber chu vaccine indaih lohna avanga chawlh lailawk a nih hnuin, union health minister Harsh Vardhan chuan Pathianni khan ni thum chhungin state leh union territory-te hnenah vaccine dose nuai 51 pek chhuah a ni dawn tih a sawi.

Hripui leng thawh hnihnain India healthcare system nasa taka a nghawng buai hnuin, ram ṭhahnem tak chuan April 27 leh May 15 chhung khan India tan oxygen concentrator 11,058, oxygen cylinder 13,496, oxygen generation plant 19, ventilator 7,365 leh Remdesivir vial 5.3L an pe a ni.

Delhi, Punjab, Haryana leh Uttar Pradesh chuan hri darh tur ven nan khuahkhirhna an pawtsei. Delhi-ah chuan tun thla tira nitin hri kai 25,000 hmuhchhuah ṭhin pawh a tlahniam tawh tih sawiin, Punjab-ah erawh hri kai an la tlahniam thei lo.

Bharat Biotech chuan Covaxin vaccine an siam chhuah chu India rama Covid hri chi hrang hmuhchhuah, B.1.167 leh UK a hmuhchhuah B.1.1.7 lakah a thawk ṭha hle niin a sawi.

Ganga luia Covid vanga thi ni ngeia rinte ruang eng emaw zat paih a nih avangin Bihar leh Uttar Pradesh-ah police te chuan luikam an vil uluk hle. Sorkar laipui chuan state hnenah mitthi ruang luia paih tawhlo turin a hrilh.

Prime minister Narendra Modi chuan Pathianni khan Uttar Pradesh, Chhatisgarh, Rajasthan leh Puducherry chief minister-te kawmin, an state chhunga hri lengmek dinhmun a sawipui.