Congress-in mi rethei tan thla tin Rs 6,000 pe turin PM ngen

Lok Sabha-a Congress leader Adhir Ranjan Chowdhury chuan Pathianni khan state hrang hranga mi harsa leh ṭanpui ngaite tan thla tin cheng 6,000 pe turin prime minister Narendra Modi hnenah ngenna a thawn.

Adhir Ranjan Cho­­­wdhury chuan in­khuahkhirhna siam vang­in mi rethei leh nitin in­hlawh­fa chawpa khawsa harsa tak tak ten hna an thawk thei lo a, an chhungte tan ei tur an thawk chhuak thei tawh lo a ni, a ti.

"Congress president chuan sorkar laipui chu hnathawk thei lote tan a thlawnin buh leh pawisa, Rs 6,000 thlatin a pe turin a duh a ni. Hripui leng mekah heng mi retheite hian enkan an hlawh fo a, sorkar laipui chuan heng mite lakah hian ngaihtuahna lo seng se, West Bengal tiamin lockdown puang mek state-a chhungkaw harsa tak takte account ah Rs 6,000 lo thun sak turin Congress President chuan a ngen" tiin Chowdhury chuan a sawi.

Chowdhury chuan PM Modi hian coronavirus case pun chhhan te sawifiah a, hri leng do hneh a nih theihna tura ruahmanna siamte zawm tura ngen a, ram mipuite tana thuchah sawi tura a duh thu a sawi bawk. "Hri leng dihmun hi thunun hleih theih a ni tawh lo a, hetihlai hian PM chuan mipui hnenah inrintawkna an neih theihna turin hma a la tur a ni. A ṭul a nih chuan lockdown khauh tak puan pawh a hreh lo mai tur a ni," a ti.

Chowdhury hian Zirtawpni khan Lok Sabha Speaker Om Birla hnenah ram chhunga hrileng dinhmun leh hmalakna te, sorkarin Covid-19 vaccine policy a siamte sawiho tura Public Accounts Committee meeting hmanhmawh ko turin a a lo ngen. Hemi hma hian Om Birla leh President Ram Nath Kovind hnenah Covid-19 vanga health emergency puan chungchang sawiho tura Parliament special session ko turin alo ngen tawh bawk.