CBI-in West Bengal minister 2 an man Bengal CM-in CBI office luhkhung
West Bengal-a Trinamool Congress sorkar thara minister pahnih, Firhad Hakim leh Subrata Mukherjee-te chu nimin zing khan Narada bribery case-ah central bureau of investigation (CBI) officer-ten an man. He thil thlen avanga lungawi loin, chief minister Mamata Banerjee chuan nimin vek khan Kolkata-a CBI office luhchilhin, amah pawh man ve turin a ti.
CM Banerjee chuan a minister-te man an nih danah dan kalphunga tih engmah a awm lo tih sawiin, "Hetianga an ti dawn anih chuan kei pawh min man ve rawh se," a ti. CBI office kawtah hian TMC member eng emaw zat an pungkhawm bawk.
CBI hian thamna laa puh chungchangah nimin zing khan minister pahnihte bakah TMC MLA Madan Mitra leh TMC hruaitu hlui, kum 2019-a an party chhuahsantu Sovan Chhaterjee-te an man an ni. An pali hian Mamata kaihhruai TMC sorkar hmasaah khan minister vek an ni. Kum 2014-a Narada news portal-in sting operation a neihah khan thamna, Rs nuai 4-5 laah puh an ni.