India ah hri kai thar zat tlahniam zel : Ni khata hri vanga thi tam ber ni thleng thung

India ramah Covid-19 hri kai thar an tlakhniam zel laiin Thawhṭanni khan ni khata hripui vanga thi tam ber ni a thleng thung. Union health ministry-in a tarlan danin, Thawhṭanni khan ram pumah hri kai thar 2,63,533 awmin, coronavirus kaihhnawiha thi 4,329 an awm.

Ram puma hri kai hmuhchhuah tawh zawng zawng chu 2,52,28,966 niin, an zingah thihpui 2,78,719 an awm tawh.

Thla khat dawn chu ni khata hri kai thar zat hi nuai thum chuang zel niin, ni eng emaw zat ni khatah hri kai thar nuai li chuang an awm hman bawk. Mahse tun thla chhunga a zawna a ni hnihna atan ni khatah hri kai thar nuai thum tling lo an awm ta a ni.

John Hopkins University tarlan danin, nimin thleng khan khawvel pumah Covid-19 hri kai hmuh chhuah tawh mi vaibelchhe 16.36 an awm tawh a, an zinga nuai 33.85 in an thihpui tawh a ni. US chu khawvela hri kai leh thihpui tamna ber ram a la ni chhunzawm zel.

India rama Covid-19 dinhmun
Coronavirus kai mek, active case 33,53,765 an awm. India rama active case zinga 75% chu state 10 ami te an ni. State hrang hrang zingah Karnataka, Maharastra, Kerala leh Tamil Nadu te chu hripui leng thawh hnihna tuarna ber an ni mek.

Prime minister Narendra Modi chuan state leh district tina field official-te chu Covid-19 chungchanga an hma lak dante sawipuiin, nimin khan virtual meeting a nei. Karnataka, Bihar, Assam, Chandigarh, Tamil Nadu, Uttarakhand, MP, Goa, Himachal Pradesh leh Delhi-a official-te chu meeting-ah hian an tel.

Union health secretary Rajesh Bhushan (health member) leh NITI Aayog Vinod K Paul-te chuan Pathianni khan state leh UT-te chu high-level video conference meeting an lo neihpui tawh bawk. Pathiannia meeting -ah hian peri-urban, rural leh tribal area huamchhungah 'Covid-19 Containment & Management' chak zawka kalpuia enkawl dan turte sawihoin, state tam taka hmuhchhuah thar black Mucor-mycosis fungi chungchang pawh an sawiho bawk.