PM-in state leh district-a field official-te meeting neihpui
Prime minister Narendra Modi chuan nimin khan state leh district-a field official-te chu virtual meeting a neihpui a, Covid-19 hri dona kawnga an hnathawh leh hma lak dante a sawipui.
Virtual meeting hi Madhya Pradesh chief minister Shivraj Singh Chouhan leh Karnataka chief minister BS Yediyurappa bakah union home minister Amit Shah-ten an hmanpui a ni.
PM Modi chuan state leh district hrang hranga official-te chuan hri leng dona kawngah chona hrang hrang an hmachhawn tih sawiin, district tinah hnehna an chang a nih chuan India-in hnehna a chang dawn tihna a ni, a ti. Official tam tak chu Covid positive chungin an theih angin an hna an thawh chhunzawm zel tih pawh a hriat thu Modi chuan a sawi.
Hri leng dona kawngah district official-te chanvo pawh a pawimawh a, 'field commander' ang an ni tiin PM chuan a sawi a, policy siamṭhat ngai a awm nia an hriat pawhin inthlahrung loa sawi zel turin a chah.
Modi chuan local containment zone siam te, test tam zawk neih zel leh mipuite hnena information dik leh kimchang pek a pawimawh thute a sawi bawk. Hri leng thawh hnihna thleng mekah thingtlang lamte ngaihven ṭhat a ṭul thu a sawi bawk a ni.
Covid vaccine lak chu hri dona pawimawh tak a ni tih sawiin, vaccine chungchanga insawiṭhaihna awm ṭhinte paihbo a ngai a ni, a ti. State tinah vaccine tam zawk thawn a nih theihna turin hma lak mek a ni tih Modi chuan a sawi bawk.