Covid vaccine thawn chhuah titawp chhunzawm dawn

India chuan ram chhunga Covid-19 vaccine mamawh a san avangin October thla thleng chu ram pawn lama vaccine thawnchhuah a titawp chhunzawm dawn nia sawi a ni.

Ram chhunga hri kai thar an pun chak chhoh tak em avangin thla khat liam ta aṭang khan ram pawn lamah vaccine thawnchhuah chu tihtawp a ni a, hei vang hian India vaccine siam lo ringtu Bangladesh, Nepal, Sri Lanka leh Africa-a ram eng emaw zat pawhin kawng dang an dap a ngaih phah a ni.

Vaccine hi ram danga thawnchhuah theih hun tur sawi chian a la ni lo a, ram chhunga hri leng dinhmun azirin la ngaihtuah tur nia sawi a ni. Hemi chungchangah hian vaccine thawnchhuah buaipuitu, ministry of external affairs chuan engmah a la sawichiang duh lo.