Coronavirus laka India mite chhanhim turin India-in China-ah Air India Boeing 747 a tir
Coronavirus darhna hmunpui China central Hubei province-a Wuhan City a India mi chengte hruaichhuak turin Air India chuan nimin khan thlawhtheihna lian Boeing 747 a tir a, tukin dar 2 khan India ram lam lo thlawk let leh tawh tura beisei a ni.
India-in China-a thlawhtheihna a tirh hian mi 325 vel a phur thei dawn nia tarlan a ni a, hemi hmang hian Wuhan leh a ṭhenawm khuaa mite thiar chhuah an ni phawt ang a, chumi hnuah chuan hmundanga mite thiarchhuak turin midang tirh leh an ni ang.
Air India Boeing 747 hi Mumbai aṭanga thlawkchhuak phawtin Delhi-ah a ṭum leh a, Delhi aṭangin China-a Wuhan hi a pan leh a ni. Crew member 16 an chuang a, heng mite hian hmai tuamna leh kutkawr bakah disinfectant spray-te an inring sa thlap a, thlawhtheihna aṭang hian an chhuak dawn lo bawk.
An thlawh chhung hian an passenger-te a tlem thei ang ber be tura hriattir an ni a, thlawhtheihnaah hian coronavirus vei lanchhuahna nei lote chauh phurh an ni bawk ang.
External Affairs Ministry thupuangtu Raveesh Kumar chuan Ningani khan China sorkar nen Coronovirus chungchangah hian inbiakna an nei tih sawiin, thlawhtheihna pahnih hmanga India mite phurhchhuah an dil tih a sawi.
Delhi aṭanga Wuhan thleng tur hian darkar ruk vel hun hman a ngai dawn a, China-ah hian darkar hnih aṭanga darkar thum vel an awm dawn a ni.
Coronavirus leh a kaihhnawih:-
1 Wuhan aṭanga India mi thiarchhuahte hian Delhi leh Manesar-a isolation centre-ah ni 14 chhung hun an hmang phawt dawn a, hetah hian an dinhmun enfiah a ni ang.
2 Thlawhtheihnaah hian doctor panga bakah paramedic pakhat a chuang tel. Special Medical kit dah a ni a, hei hi Union Health Ministry buatsaih sak a ni.
3 Doctor leh crew-te hi invenna tur thuam famkim nen an inthuam dawn a, thlawhtheihna chhuahsan lo tura hriattir an ni. Hri vei lote chauh thlawhtheihnaah an chuantir ang.
4 Crew member- pilot, engineer leh doctor-te hi an lo let leh hnuah kar khat chhung an inah an inkhung dawn. Natna lanchhuahna eng emaw an neih chuan isolation ward-ah inhriattir thuai tura tih an ni.
5 World Health Organisation (WHO) chuan Ningani khan Coronavirus vang hian "global health emergency" a puang. Mi 200 chuang an thi tawh.
6 Ningani khan India-ah Coronovirus case hmasa ber hmuhchhuah a ni. Kerala mi Wuhan University-a zirlai a ni a, Thrissur-a General hospital-ah ama pual bik ward-ah enkawl mek a ni. Kerala Health Minister KK Shailaja chuan a dinhmun a ṭha tih a sawi.
7 Kerala hmar lamah rinhlelh thilah mi pathum isolation ward-ah dah mek an ni. Mi 800 vel chu rinhlelh thilah enfiah mek an ni bawk. Delhi leh Mumbai-ahte pawh rinhleh vanga enfiah an nei mek.
8 2002-03-a China leh Hong Kong-a mi 800 vel zetin an thihpui SARS leh Coronovirus hi a inang deuh nia sawi a ni. Scientist-te chuan thla thum chhungin a damdawi hmuhchhuah hman an inbeisei; China chuan HIV damdawi Aluvia chu hri leng veite enkawlna atan hian a enchhin.
9 Respiratory infection dang ang bawkin khuh leh hahchhiau hmangin a inkaichhawn theih. Ni 14 vel thleng chu natna hi a langchhuak lo thei a, natna a lanchhuah hma pawh hian inkaichhawn theih a ni mai thei tih mithiamte chuan an sawi.