India ramah hri vanga thi tam ber ni thleng leh

India ramah Thawhlehni khan Covid-19 vangin mi 4,529 thih belh lehin, ni khata hri vanga thi tam ber ni a thleng leh. Hemi ni hian hri kai thar mi nuai 2.67 an awm bawk.

May 12 hnuaah Thawhlehni khan ni khata Covid-19 kaihhnawiha thi 4,000 chuang an awm ṭum sarihna a ni.

Hetih lai hian hri kai thar erawh an tlahniam a, Thawhṭanni aṭang khan ramchhungah hri kai thar nuai thum tling lo zel an ni tawh a, April 21 hnuah a tlahniam ve ta a ni.

State 22-ah positivity rate chu 15% aiin a la sang tih union health minister Harsh Vardhan chuan nimin khan twitter kaltlangin a sawi. India ram puma positivity rate chu 13.31% niin, Thawhlehni khan sample 20,08,296 test belh leh a ni bawk.

Thawhlehni khan hri kai mek active case chu 32,26,719 awmin, heng zinga 70 % chu state pariata mi an ni. Karnataka, Maharastra, Kerala leh Tamil Nadu te chu hri leng thawhhnihna tuar na ber an ni.

Sorkar laipui chuan Thawhlehni khan India rama mipui cheng zinga 1.8% chauhin hri hi an la kai tih sawiin, " Hri kai hmuhchhuah in pun lam pan zel mah se mipui cheng zinga 2% hnuailamah kan la dah thei a ni. Kan inthlahdah thiang lo a, kan inven zel a ṭul a ni," tiin official chuan a sawi.

Ram pumah Covid vaccine dose vaibelchhe 18.58 pek chhuah a ni tawh bawk.

Kum 18-44 inkar mi nuai 5.14 in Thawhlehni khan vaccine dose khatna an la a. Vaccination drive thawh thumna, kum 18-44 inkar tana kalpui mekah, state leh UT 36-ah mi nuai 64.60 in vaccine an la tawh a ni.

NITI Aatog Dr VK Paul chuan Thawhlehni khan ni 10-12 hnuah kum 2-18 inkar tan clinical trial an nei dawn tih a sawi. Ram tam zawk chuan naupang pual tur Covid-19 vaccine hi an la nei lo.

Delhi chief minister Arvind Kejriwal pawhin naupang, Covid-19 hri vanga an nu leh paten an boralsante chu Delhi sorkarin thla tin Rs 2,500, kum 25 an tlin hma a pe ṭhin dawn a, hei bakah hian an zirna senso pawh Delhi sorkarin a tumsak vek dawn tih a sawi. Kejriwal chuan chhungkaw rethei, mi nuai 72-te tan tun thla atan ration kg 10 a thlawnin an sem dawn tih a sawi bawk.

Covid-19 vangin UP minister Kashyap a thi
Uttar Pradesh minister of state for revenue and flood control Vijay Kashyap chu coronavirus vangin Thawhlehni khan Gurgoan Medanta Hospital-ah kum 56 mi niin a thi. Kashyap hi Muzaffarnagar Charthawal Assembly seat aṭangin MLA a thlan tlin a ni.

UP-ah hian Covid-19 vangin minister pathum an thi tawh a ni. Nikum khan minister Kamal Rani Varun leh Chetan Chauhan-te chu he hri vang hian anlo boral tawh bawk.

Kashyap hi kumina hri leng thawh hnihna thlenga BJP legislator thi pangana a ni bawk. A hmain Salon MLA Dal Bahadur Kori, Kesar Singh Gangwar (Nawabganj), Ramesh Diwakar (Auraiya), leh Suresh Kumar Srivastava (Lucknow West) te chu Covid-19 vang hian an lo thi tawh a ni.