Sorkar laipuiin Covid-19 vaccine dose vbc 5 a thlawnin sem dawn

Sorkar laipui chuan Covid-19 vaccine chi hnih, Covishield leh Covaxin dose 5,86,29,000 chu May 1 - June 15 inkar hian a thlawnin a sem dawn tih Nilaini khan a sawi.

State leh UT-te hian sorkar laipui hnen aṭanga a thlawna vaccine an dawn bakah hian, vaccine siamchhuaktu te hnen aṭangin Liberalised Pricing and Accelarated National Covid-19 vaccination strategy hnuaiah kumin June thla ral hmain dose 4,87,55,000 an lei thei bawk ang.

India ramah hian tun thlengin Covid vaccine dose maktaduai 187 dawn siam chhuah a ni tawh.

Liberalised pricing and accelarated national Covid-19 vaccination strategy chu India ramah May 1 aṭang khan kalpui ṭan a ni a, hemi hmang hian Central Drugs Laboratory (CDL) pawmpuina hnuaia vaccine siamchhuah 50% chu state leh UT tan sokar laipui kaltlanga semchhuah ṭhin a ni a, a bak 50% chu state leh UT-ten vaccine siamchhuaktu te hnen aṭanga an lei a ngai ve thung a ni.

Union health ministry chuan state leh UT te chu vaccine semchhuah dan kawnga an ruahmanna te zawtin, chak zawka sem a nih theih nan media platform hrang hrangte chu vaccine kaihhnawiha thuthar thehdarhna atan hmang ṭangkai turin a chah. Vaccination centre-te chu Co-Win platform kaltlangin vaccine semchhuah dan tur chipchiar taka tarlang ṭhin turin a ti bawk.

State leh Union territory-te chu June 15 thlenga vaccine pek dan tur chungchangah ruahmanna felfai taka siam tura ngen an ni. Prime minister Narendra Modi chuan Thawhlehni khan sorkar laipui chuan ni 15 hma zelin vaccine awmdan an hrilh lawk ṭhin tur thu official-te a hrilh.