ICMR in Covid home-based RAT kit pawmpui

Indian Council of Medical Research (ICMR) chuan mahni ina Covid-19 test theihna tur, rapid antigen testing (RAT) kit pawmpuina a tichhuak a, mipui lei theih tura peih fel a ni thuai dawn a ni.

"Natna lanchhuahna nei, mahni ina in test duh te tan RAT hi hman chauh tur a ni a, laboratory-a positive hmuhchhuah te nena inhnimhnai ten an hmang thei ang" tiin ICMR chuan Nilaini khan a sawi.

He ruahmanna hi thingtlang lam ten awl­sam zawka RAT test an neih theihna atana siam niin, home-based RAT hian Covid kai natna langchhuak te in test tur kal chhuah kher ngai lo a, mahni in luma an in test mai theihna atana tih a ni.

Council hian test kalpui chungchanga thlei bik nei loa kalpui turin a chah a,RAT posi­tive zawng zawngte chu home isolation leh ICMR protocol hmanga inenkawl turin an chah.

Mahni ina RAT neihna tur hi Mylab Discovery Solutions siamchhuah a ni a, a hmangtur te chuan Google play store leh Apple store-a mobile App dah chu an download tur a ni. He kit hmangtute chuan mobile app-a an inziahluh hnuah, an in test zawh hnua test strip-te chu mobile phone ngai bawkin a thla lain an thehlut leh tur a ni. He test-a positive anga hmuhchhuah chu result dika ngaih a ni dawn a, test ṭhat a ngaih tawh loh thu ICMR chuan a sawi