Covid-19 vei naupangte data lakhawm turin PM in hriattir

Prime minister Narendra Modi chuan nimin khan district official-te hnenah naupang zinga Covid-19 hri kai data lakhawm turin a hriattir.

PM Modi chuan Covid-19 hri inthlak danglam zelah naupang zawkte dinhmun ngaihtuah a ngai hle tih a sawi. India rama hri chi hran hmuh chhuah, B.1.617.2 chu kum naupang zawkten an kai chho nia hriat a nih avangin district official-te chu an district huam chhunga ṭhalai leh naupang, Covid-19 hri kaite data lakkhawm a, ennawn fo turin a chah.

Modi hian nimin khan state 11-a district magistrate-te virtual meeting neihpuiin, hri leng mek dinhmunte a sawipui a ni.

Uttarakhand-ah chuan ni 10 liam ta chhung khan naupang 1,000 (kum 9 leh a hnuai lam) in hri an kai a, May thla chawlhkar hmasa pahnih chhung khan naupang 1,600 chuangin hri an kai bawk. Thawhṭanni khan Singapore pawhin an rama B.1.617.2 strain hmuh chuan naupangte a nghawng tel tih a lo sawi tawh bawk.

US-a doctor-te pawhin he strain hi zirchiangin, Centers for Disease Control and Prevention chuan April thla tir lam aṭang khan he Covid strain kum 65 chunglam aiin naupang leh tleirawlten an kai nasa zawk niin a sawi bawk a ni.

India ramah kum 18 hnuai lam tana Covid-19 vaccine pawm ala awm lo. Bharat Biotech siam Covaxin chu kum 2-18 tan clinical trial neih thuai tum a ni. Hetih lai hian US, Canada leh khawthlang ram ṭhenkhat chuan Pfizer vaccine chu naupangte pawh an pe tel thung.