May thlaa hri kai hmuhchhuah nuai 77 chuang awm tawh

India ramah Inrinni liam ta khan Covid-19 hri kai thar 2,40,842 awm belh lehin, nimin zing thlenga hri kai hmuhchhuah tawh zawng zawng chu 2,65,30,132 an ni. Inrinni vek khan hripui vang hian mi 3,741-in nunna an chan leh a, hri vanga thi zat hian nuai thum an hnaih tawh hle.

May thla chhungin hri kai thar nuai 77.67 an awm tawh a, April khan nuai 66.13 awmin, March khan nuai 10.25 an awm a ni. May thla chhung vek hian mi 90,000 an thi tawh a; April khan thi 45,000 awmin, thihpui hi a letin an pung a ni. March thla khan mi 5,417, February ah 2,777 leh January khan 5,536-in an thihpui anga chhinchhiah a ni.

Black Fungus/Mucormycosis chuan India-ah mi 9,000 chuangin an kai tawh tih sorkar laipui chuan sawiin, damdawi mamawh inchhek khawl tumin ṭan a la mek tih a sawi.

Union health ministry chuan state pariatin hri kai mek,active case nuai khat chuang an nei tih a sawi. State 20 chuan active case 50,000 aia tlem an nei a, state pariatin active case 50,000 - 1,00,000 inkar an nei bawk a ni.

Inrinni khan sorkar laipui chuan ramchhungah kar hnih liamta chhungin positivity rate a tlakhniam thu a sawi. State 18-ah positivity rate 15% aiin a sang a, state 14-ah 5% - 15% inkar niin, state pali-ah positivity rate 5% aiin a tlem thung a ni.

India rama hri kai tamna ber Maharastra-ah chuan ziaawm lam an pan chho zela, Karnataka, Kerela, Tamil Nadu-ah chuan hri kai an pun belh zel thung. Inrinni khan Karnataka-ah hri kai thar 31,183, Kerela-ah 28,514 ,Tamil Nadu-ah 35,873 leh Andra Pradesh in 19,981 hri kai thar an awm a ni.

Tamil Nadu, Kerela leh Karnataka chuan lockdown an pawtsei. State tam tak chuan hri leng chhutchah nan khuahkhirhna khauh tak an kalpui mek bawk.