Delhi-ah May 31 thleng lockdown pawtsei Positivity rate 2.5% ah tla thla
Covid-19 hri leng thawh hnihna in ziaawm lam pan zel mah se Delhi chief minister Arvind Kejriwal chuan May 31 zing dar 5 thleng lockdown a pawtsei. "Delhi-a positivity rate chu 2.5% ah a tla thla tawh a, darkar 24 liamta chhungin Covid-19 kai 1,600 hmuhchhuah thar a ni" tiin Delhi CM chuan nimin khan a sawi.
Hri leng thawh thumna hmachhawn turin inbuatsaihna kalpui ṭan tawhin, thuneitute chuan health infrastructure tihhmasawn nan oxygen plant leh ICU khum siam belh turin zing leh zan thlu lovin hna an thawk a, tun anga case a tlakhniam zel chuan, May 31 hnu lamah chuan lockdown titawpin khuahkhirhna mumal tak nen an kal tawh tur thu CM chuan a sawi.
Mi hrang hrang a rawn hnu leh, mipui nawlpui pawhin an duh zawk avangin lockdown hi kar khat dang an pawtsei tih Kerjiwal chuan a sawi a, theihtawp chhuaha an lo beih tawhna a thlawn mai lohna turin lockdown kalpui chhunzawm chu a ngai a ni, a ti.
Delhi-ah hian kum 18-44 inkar tana vaccine pek chhuah a nih hnuah, Inrinni khan vaccine indaihlohna tihtawp leh rih a ni. Kejriwal chuan vaccine indaih lohna a awm chhoh zel chuan vaccine dawng kim turin thla 30 tal an nghah a ngaih tur thu a sawi. CM chuan prime minister Narendra Modi hnenah vaccine supply leh Delhi quota ti tam turin a ngen.
Ramchhunga vaccine indaihlohna thleng chho zel chungchangah Kejriwal chuan Modi hnenah rawtna pali a thlen. Chung zingah chuan ramdang aṭanga vaccine lakluh dan dap tur te, firm ten India rama vaccine an siamchhuah theihdan tur te a tel. .