Madhya Pradesh : Scindia-a'n Congress chhuahsan Congress MLA 20-in banna thehlut nghal

Madhya Pradesh-a Congress senior leader, Jyotiraditya Scindia chuan nimin khan an party a chhuahsan. Amah thlawptu Congress MLA 20-ten banna an thehlut zui ve leh avangin, chief minister Kamal Nath kaihhruai Congress sorkar pawh a tlak ve nghal rin a ni. 

MP-a rorellai, Congress party MLA 20, Scindia thlawptute hi Thawhṭanni tlai aṭang khan biak pawh theih lohin an awm a ni.  MLA helte an biakpawh theih loh avangin CM Kamal Nath chuan emergency meeting a ko nghal a, meeting zawh hian minister-te chuan minister an nihna aṭanga banna an thehlut nghal a ni. Minister-te chuan Kamal Nath hi an rintawk thu sawiin, cabinet chu din thar leh turin an ti. 

Mahse nimin zing khan Scindia hian prime minister Narendra Modi leh union home minister Amit Shah a hmuh hnuah, Congress aṭanga a ban thu hi a puang ta a ni. Scindia-an a ban thu a sawi hnu lawkah, Congress party pawhin an party duhdan kalha thil a tih avangin an party aṭanga hnawhchhuah a nih thu a puang zui ve nghal bawk. 

Congress interim president Sonia Gandhi hnena banna a thehluhah, Scindia chuan kum 18 chhung Congress party tan member rinawm tak a lo ni tawh a, tunah chuan hma lam pana ke a pen a hun ta nia a ngaih thu a sawi. A tir aṭanga a tum ber chu state leh rampum mipuite rawngbawl a ni tih sawiin, Congress party chhunga a awm reng chuan he a thil tum hi a tithei dawn lo nia a ngaih thu a ziak.  Hei vang hian bul a ṭan thar a ngai ta niin a sawi a ni. 

Kum 2018 assembly inthlan neih hnua Madhya Pradesh-a Congress kaihhruai sorkar a din dawn khan chief minister dinhmun inchuhna a lian nghal hle. Party senior leader pahnih, Kamal Nath leh Jyotiraditya Scindia te chu CM atana buk an ni. Party lam thuneitu sang pawhin hun rei tak a buk tawn  hnuah Kamal Nath hi CM atan hian an ruat zui a ni. 

Kum 49 mi, Scindia hian Madhya Pradesh-a Congress an chak theihna turin a tha pawh a thawh nasa a, CM atana thlan a ni lo pawh hi a lawm lo nia sawi a ni. Sorkar a din hnuah pawh Kamal Nath leh Scindia-te hi an thawhzuina a ṭha dun vak lo a, hei hian party chhungah pawh buaina ruk siamin an buaina hi a rawn irh chhuak ta a ni. 

BJP chuan Scindia thlemin, Rajya Sabha inthlan neih tura seat pek a, thlan tlin a nih chuan sorkar laipuiah cabinet minister-a dah an tiam nia sawi a ni. Scindia hian Madhya Pradesh-ah BJP sorkar a din leh theihna turin theihtawpin a pui let thung ang tih a ni bawk. 

Member 230 awmna, Madhya Pradesh-ah hian rorellai Congress hian MLA 114 neiin, independent MLA pali, Samajwadi Party MLA pathum leh Bahujan Samaj Party MLA pahnihte thlawpna in sorkar a siam a ni. BJP hian MLA 109 a nei thung a, MLA seat hnih a ruak mek bawk a ni.