Covid-19 : IAF-in Iran aṭangin mi 58 hruai haw

Indian Air Force transport aircraft chuan Covid-19 vanga Iran-a tang mek India mi 58-te chu nimin khan a hruai haw.

IAF thlawhtheihna hi Thawhṭanni zan khan a thlawk chhuak a, nimin khan India-ah a rawn let leh tawh a ni. Thlawhtheihna C-17 Globemaster hmangin India mite hi an hruai kir a, external affairs minister S Jaishankar chuan a twitter-ah IAF-te chuan hlawhtling taka an hna an thawh zawh thu a sawi. "India khualzin batch hmasa 58-te chu Iran aṭangin hruai kir anni tawh. IAF C-17 in Tehran aṭangin a rawn thlawhchhuah pui tawh a, Hindon-ah a rawn ṭum thuai beisei a ni," tia tweet a siam zawh hnuah ,"IAF thlawhtheihna pawh a lo ṭum tawh. Hna a zo. A dawtah kan kal leh ang." tiin tweet a siam leh.

C-17 hi Hindon airbase, Ghaziabad-ah a ṭum a, an mi phurhte hi enfiah chhunzawm an ni dawn. India hian China aṭang pawhin India mi eng emaw zat a hruai kir tawh bawk. Iran-ah hian Covid-19 vang hian mi 237 lai an thi tawh a, 7,000 velin an vei tawh bawk. Hetihlai hian Iran-ah hian India mi 2,000 vel zet an awm a ni.