India ramah Covid-19 vanga thi nuai 3 tling tawh

India ramah Pathianni khan Covid-19 hri vangin mi 4,454 in an thih belh leh a, he hri vanga thi hi India ram pumah mi nuai thum an chuang tawh tih Union Health Ministry chuan nimin khan a tarlang.

Tun hnaiah hripui vanga thi hi ni khatah mi 4,000 chuang an awm chho fo tawh a ni. Inrinni liam ta khan coronavirus kaihhnawihah mi 3,741 an thi a, May 21 khan mi 4,194 in an thihpui a, May 20 khan thihpui 4,209 awmin May 19 khan thihpui 3,874 an awm bawk. May 18 khan hri vanga thi hi mi 4,529 awmin May 17 ah 4,329, May 16 ah 4,106 leh May 15 khan mi 4,077 in an thihpui a ni.

Maharashtra chu hripui thihpui tamna ber state niin, Covid-19 hri hi mi 82,620 in an thihpui tawh. Karnataka (25,282), Delhi (23,202) leh Tamil Nadu(20,468) in an dawt. Pathianni khan coronavirus kai thar 2,22,315 leh dampui 3,02,544 an awm bawk. Ramchhunga hri kai hmuhchhuah tawh zawng zawng chu 2,67,52,477 an ni.

India ramah hri kai mek active case 27,20,716 an awm, active case zinga 65% hi state pasariha mite an ni.

Ran aṭanga Covid-19 kai an awm hriat a ni lo : PETA
Covid-19 hri leng pung zel karah, People for the Ethical Treatment of Animals (PETA) chuan ran aṭangin mihringin Covid-19 hri an kaichhawn hriattur a la awm loh thu an sawi.

PETA India CEO, Manilal Valliyate chuan, " Tun thlengin kan ran vulh, a bikin ui, zawhte leh ransa dang hnen aṭangin mihringin Covid-19 an kai tih hriat tur ala awm lo," a ti. Hemi rual hian report ṭhenkhat aṭanga a lan danin mihringin a ran vulhlai hnenah hri hi an kai chhawng thei thung niin Villiyate chuan a sawi.

Delhi-a senior veterinary Dr Ram Jatan chuan coronavirus chu ran vulh chiin mihring a kai chhawn theih loh thu sawi bawkin, ui tan coronavirus vaccine a hranin an siam tawh thu leh ui-a virus strain a danglam thu a sawi.