Loneituten May 26-ah 'Black Day for Democracy' hmang dawn

Sorkar laipui farm law thar pathum a siam duh lohna lantira hun rei tak nawrh huaihawt tawh, loneitu pawl 40 intelkhawmna Samyukt Kisan Morcha (SKM) chuan May 26-ah 'Black Day for Democracy' atan an hmang dawn tih an puang. Loneitu pawlte thiltih hi eptu party lian 12 te chuan an thlawp thu an sawi.

Loneitute hian farm law pathumte sut tura sorkar laipui an phut chungchangah, kar liam ta Zirtawpni khan prime minister Narendra Modi hnenah lehkha thawnin, inbiakna neih chhunzawm leh an phut a ni. Mahse nimin thleng khan sorkar lamin an ngenna chungchangah chhanna a la pek loh avangin, nasa zawka nawr an tum tih an sawi.

PM Modi hnenah pawh May 12 khan ngenna an thlen tawh thu sawiin, ram puma hripui leng vanga harsatna nasa tak a thlen mek avangin, loneitute venhimna atan leh India ram mipuite ei turte an thawh chhuah leh thuai theihna atana farm law tharte chu sut tura an ngen thu an sawi. Loneitu pawl aiawhte pawh inbiakna neih chhunzawm leh thuai turin an phut bawk.