Yes Bank kaihhnawih Mumbai-a hmun pasarih an dap

Central Bureau of Investigation (CBI) chuan Thawhṭanni khan Yes Bank tlakchhiatna chungchanga FIR thehluh bawhzuiin, Mumbai-a hmun pasarih an dap. 

Yes Bank dintu Rana Kapoor leh he bank kaihhnawih mi dang lakah FIR hi thehluh a ni. Mumbai-a Kapoor-a chenna bakah DHFL, RKW developers and Doit Urban Ventures Pvt Ltd., DHFL Bandra office-te pawh CBI hian an dap bawk tih Enforcement Directorate (ED) official-te chuan an sawi.

Indian Penal Code (IPC) hnuaia Sections 120 (B) (Criminal Conspiracy), 420 (Cheating) leh Prevention of Corruption Act hnuaia Section 7, 12 & 13-te tlawhchhanin March 7 khan CBI chuan Kapoor, Doit Urban Ventures (Kapoor-a chhungte nena inzawmna nei company), DHFL, Kapil Wadhawan (promoter of DHFL) leh midangte lakah hian Yes Bank buaina chungchangah New Delhi-ah FIR a thehlut a ni.

Bandra west-a Kapil Washawan chenna in, DR A B road-a Worli hmun, Nariman point-a Rakhee Kapoor Tandon chenna in, Bandra west-a RKW developer-te awmna, Elphinstone road-a DHLF office, Sir PM road fort-a DHLF office leh Nariman point-a Radha Kapoor Khanna chenna inte chu CBI-te chuan an dap a ni.

CBI-in Yes Bank buaina chungchanga FIR a thehluhah hian kum 2018 April leh June thla khan Yes Bank-in hun reilote atan Dewan Housing Finance Corporation Ltd (DHFL) hnenah Rs vbc 3,700 investment an tih thu tarlan a ni. He investment an tih vang hian bank hian Non Performing Assest (NPA)/ loan rulh ṭhat loh a neih tam phah nia sawi a ni. DHFL promoter Kapil Washawan chuan loan-in Rs vbc 600 chu Kapoor leh a chhungte hnenah a pek bakah Kapoor-a fanu (Rakhee Kapoor Tandon, Roshni Kapoor and Radha Kapoor)-te ta, DoIT Urban Ventures (India) Pvt Ltd. pawh loan pek an ni tih FIR-ah hian tarlan a ni bawk.