Ni 40 hnuah Covid-19 kai thar nuai 2 aiin an tlem ta

India ramah Thawhṭanni khan ni 40 hnua a vawi khatna atan Covid-19 hri kai thar nuai hnih aia tlem hmuhchhuah a ni. Hri kaihhnawiha thi 3,260 awm belh lehin, ni 27 hnua ni khata hripui vanga thi an tlem ber ṭum a ni bawk.

Thawhṭannia hri kai thar hi 195,994 an ni a, April 13-a hri kai thar hmuhchhuah 1,85,295 hnua a tlem ber ṭum a ni. India ramah April 14 hnua hri kai thar nuai hnih aia an tlem vawi khatna a ni .

Kar hnih chhung chu hri kai thar 22% a tlahniamin, ni sarih liam ta chhunga a tlakhniamna hi 16% a tling a, ram chhungah hri leng thawh hnihna chuan ziaawm lam a pan ṭan niin a lang.

Hetih lai hian hri vanga thi erawh an la pung zel thung. Kar liamta (May 17-23) chhung khan mi 29,331 an thi a, a hmaa kar khat chhunga thihpui tam ber ṭum (28,334) chu a rawn khum a ni.

May 17-23 inkar khan India ramah hri kai thar 17,86,873 awmin, May 10-16 inkara kai thar 23,00,440 aiin a tlahniam ve hret. Ramchhungah kar khat chhunga hri kai hmuhchhuah tam ber chu May 3-9 inkar kha niin, mi 27,44,545 in an kai thar. Kar liam ta chhung khan a san ber ṭum nena tehkhin chuan 35% in hri kai thar an tlahniam tawh.

Hri kai mek active case chu nuai 26 hnuailamah a tlathla bawk a, Thawhṭanni khan hri kai thar aiin dama puan chu nuai 1.3 in an tam zawk.

Positivity rate tlahniam zel
Nitina sample endik aṭanga hri kai hmuh chhuah zat, positivity rate pawh a tlahniam ve zel a, 9.54% a ni tawh. A zawnin ni 12 chhung chu ni khata hri kai thar hmuh chhuah aiin hri kai enkawl dam an tam tawh zawk bawk.

Nimin zing dar 7 thleng khan ram pumah vaccine dose 19,85,38,999 pek chhuah a ni tawh. Vaccine la tawh zingah hian healthcare worker, dose khatna la tawh 97,79,304 leh a dose hnihna nena la kim tawh 67,18,723 an awm a, frontline worker zingah dose khatna la 1,50,79,964 leh dose hnihna la kim tawh 83,55,982 bakah kum 18-44 inkar dose khatna la tawh mi 1,19,11,759 an awm.Thawhṭanni bik khan kum 18-44 inkar mi nuai 12.82 ten vaccine hi an la a ni.