Delhi-in China aṭangin oxygen cylinder 6,000 lalut

Delhi sorkar chuan oxygen indaih lohna phuhrukna turin China aṭangin oxygen cylinder 6,000 a lalut.

Chief minister Arvind Kejriwal chuan Delhi-a hri leng thawh hnihna chu an thunun thei tawh a, hemi rual hian hri leng thawh thumna thleng tur atan theihtawpin an inbuatsaih ṭan tih a sawi. "Hri leng hian ziaawm lam pan ṭan mah se kan inthlahdah a thiang lo. A lo thawk leh tur atan kan inbuatsaih ṭan leh nghal a ni," a ti.

China aṭanga oxygen cylinder an lakluh hmang chuan oxygen bed 3,000 siam theih a ni dawn tih sawiin, an lakluh theihna tura an puihna avangin sorkar laipui chunga an lawmthu a sawi bawk.

Thawhṭannia Delhi-a hri kai thar hmuh chhuah chu mi 1,550 niin, March 27 hnu lama ni khata hri kai thar an tlem ber ṭum a ni. A zawnin ni hnih chu hri kai thar hi 2,000 hnuai lam an ni tawh bawk. Khawpui chhunga positivity rate pawh 2.52%-ah a tlahniam tawh. Hri leng hluar lai khan positivity rate hi 30% chunglam te a tling pha a ni.