Covid report tihchhuah tlai vangin Karnataka lab-te pawisa chawitir

Karnataka-a laboratory 40-te chu Covid test result an tihkhawtlai avangin cheng nuai 20.20 chawitir an nih thu deputy chief minister CN Ashwath Narayan chuan Thawhṭanni khan a sawi.

Nodal head, Covid testing in-charge Shalini Rajneesh chuan Deputy CM te nena meeting an neihnaah laboratory hrang hrangten sample test result tihchhuah hun an tihkhawtlai chungchang hi a sawi a ni.

Laboratory hrem zingah hian sorkar lab pakua leh mimal lab 31 a tel. May 8 hnua hri kai hmuhchhuah 10,103 an awm aṭangin, heng lab hrang hrangah hian an report hi darkar 24 in an titlai zel tih an hmuchhuak a ni. Sorkar lab aṭangin case 3,034 leh mimal lab aṭangin case 7,069 tihkhawtlai an ni a, lab-te hi case khat zelah Rs 200 chawitir an ni.

Hei bakah hian lab panga te chu ICMR-a upload tel loa positive report an tihchhuah vanga khartir emaw hrem tur emaw an ni a, sample 41 result an tihkhawtlai avangin showcause notice pek an ni bawk.

CN Ashwath Narayan chuan sorkar chuan laboratory-te chu darkar 24 liam hma ngeiin test result tichhuak ṭhin turin a hrilh a, lab ṭhenkhat chuan kan dinhmun chhiatzia hi an thlir thiam lo a ni, tiin a sawi.

Narayan chuan state chhunga mucormycosis (Black Fungus) kai enkawlnan Amphotericin B (50mg) vial nuai thum thawn turin sorkar laipuiah ngenna a thlen bawk. Hei hi state COVID task force hotute nena meeting an neihah an rel a nih thu a sawi a ni.