Territory 53-ah Indian Covid-19 variant hmu chhuak tawh : WHO

Coronavirus hri thar, India rama hmuh chhuah chu territory 53 dangah hmuh chhuah a nih tawh thu Nilaini khan World Health Organization(WHO) chuan a sawi.

WHO chuan territory 53-ah B.1.617 variant hi hmuh a ni tawh tih official-a an dawn tawh bakah, unofficial-in territory dang pasarihah hmuhchhuah a nih leh thu an dawng bawk tih a sawi. Report tihchhuah thar bera a lan danin, B.1.617 variant hi inkaichhawn a awlsam hle a, a nat dan leh mihringa a nghawng dan chu zirchian mek zel a la ni thung.

Kar liam ta khan khawvel huapin hri kai hmuhchhuah 14% leh thihpui 2% in a tlahniam a, hri kai thar maktaduai 4.1 leh thihpui 84,000 an awm a ni.

WHO European region chu ni sarih chhunga hri kai hmuh chhuah leh thihpui tlemna ber niin Asia region-in an dawt a ni. America, Eastern Mediterranean, Africa leh Western Pacific region-ah pawh hri lengin zia awm lam a pan chho zel.

Hri leng hi zawi zawiin ziaawm chho ṭan mah se, khawvel huapah kar li liamta chhungin Covid-19 kai thar leh thihpui an la tam thu leh, ram ṭhahnem takah chuan hri kai hmuh chhuah an la pung hle tih report chuan a tarlang bawk.

Ni sarih liamta chhunga hri kai hmuh chhuah tam berna chu India ram niin, mi 1,846,055 hmuhchhuah an ni; Brazil-ah mi 451,424, Argentina-ah mi 213,046, United States-ah mi 188,410 leh Colombia-ah mi 107,590 hmuhchhuah an ni.

Covid-19 hri inthlak danglamah hian variant chi li: Britain (B.1.1.7), South Africa (B.1.351) , Brazil (P.1) leh India (B.1.617) te hmuhchhuah thar an ni tawh. Territory 149-ah B.1.1.7, territory 10- ah B.1.351 leh territory 59-ah P.1 hmuhchhuah tawh a ni.

WHO chuan B.1.617 variant chu chi thum (B.1.617, B.1.617 leh B.1.617.3) ah a ṭhen hrang leh a, a hmasa ber hi territory 41, pahnihna hi territory 54 leh pathumna hi ram paruk : Britain, Canada, Germany, India, Russia leh United States-ahte hmuh niin, official record-ah B.1.617 variant hi territory 53 leh unofficial record-ah territory pasarih ah te hmuhchhuah an ni. Variant paruk pawh thlithlai mek an ni bawk.

"Hri hi inthlak danglam tura beisei sa a ni, SARS-CoV-2 a darh nasat poh leh inthlakdanglamna hun ṭha a nei. Hri leng chhuchat tur chuan ruahmanna felfai leh ṭha kan mamawh, heng tel lo chuan khawvela hri leng inthlak danglam zel chuan mihring nun a chawk buai zel dawn" niin report chuan a tarlang.

India-ah hri kai thar nuai 2.08 awm
Thawhlehni khan India ramah Covid-19 hri kai thar 2,08,921 awm belh lehin, hri vang thi mi 4,157 an awm bawk. India rama hripui vanga thi hi 3,11,388 an tling tawh a ni.

Union health ministry-in a tarlan danin, Thawhlehni khan ram pumah coronavirus test 22,17,320 neih a ni a, ni khatah test neih tam ber a la ni.

Hri kai thar, positive rate pawh a ni hnihna atan 10% tling lo a ni leh a, weekly positivity rate pawh 11.45% ah a tlahniam bawk. Hri kai mek, active case pawh an tlahniam zel a, hri kai hmuh chhuah tawh aṭanga 9.42 % ah a tla thla a, enkawl dam zat pawh 89.66% a tling leh tawh bawk. May 10 aṭang khan active case hian tlakhniam lam a pan zel.

Ram chhunga hri kai tamna ber, Maharashtra state-ah chuan hri kai thar hmuh chhuah thar an tlahniam a, hetih lai hian Kerala leh Tamil Nadu-ah erawh an la pun belh hle thung. Thawhlehni thleng khan ram pumah Covid vaccine dose 20,06,62,456 pek chhuah a ni tawh bawk.