Kar 6 chhunga Covid hri kai tlem ber ni thleng

India ramah Ningani khan Covid-19 hri kai thar nuai 1.86 awmin, ni 44 hnua hri kai hmuh chhuah tlember ṭum ni a ni. Scientist-te chuan B.1.617 strain chuan thla hnih liam ta chhung khan a chakna a hloh ṭan niin an ngai.

Sorkar laipui chhinchhiah danin Ningani khan Covid-19 vangin mi 3,660 an thih belh bawk. Nikhata hri vanga thi chu ni 11 hnuah mi 4,000 hnuailamah a tla thla a ni. Ram chhungah hri len tirh aṭang khan hripui vangin mi 3,18,895 in nunna an chan tawh a ni.

Ni 15 chhung chu a zawnin hri kai thar aiin dama puan tam tawh zawkin, Ningani khan mi nuai 2.59 chu dama chhuahtir an ni.

India rama hri kai tamna ber Maharashtra state-ah chuan hri kai thar 21,273 awmin, thihpui 884 an awm. Chief minister Uddhav Thackeray chuan state sorkarin lockdown a pawtsei dawn a, hri leng mek tih ziaawm nan, June 1 aṭanga zawm turin kaihhruaina thar a duan tur thu a sawi.

Karnataka-ah chuan hri kai thar 24,214 awmin, Bengaluru-ah tam berin, mi 5,949 an awm. State positivity rate chu 17.59% ah a tla thla tawh a ni.

Tamil Nadu-ah pawh hri kai thar chu ni ruk hnuah tlahniamin, Ningani khan hmuh chhuah thar 33,361 an awm, chung zinga 2,779 chu Chennai aṭanga hmuh chhuah a ni.

Delhi ah pawh kar hnih chhungin hri kai tharin tlakniam lam pan zelin, mi 1,072 hmuhchhuah a ni. March 24 hnuah a ṭum khatna atan khawpui chhunga positivity rate chu 1.53% ah a tlahniam tawh bawk.

Assam-ah hri kai 5,704 awm tharin, state chhunga hri kai hmuhchhuah tawh 3,92,574 an awm. Hemi ni vek hian Covid vanga thi chu 83 an awm.

Sikkim-ah Ningani khan hri kai hmuhchhuah tam ber ni thlengin, hri kai thar 408 hmuhchhuah an ni. State chhunga Covid-19 vanga thi 204 tling tawhin, April 22 aṭang khan Covid vanga thi 103 awmin, hri leng thawh hnihna chhunga thi zat hi 42.91% an ni. Nyingma Institute, Martam-a zirlai 122 chu hri an kai tih hriat chhuah a ni.