Kum upa leh rualbanlote tan vaccine lakna tur siam dawn

Kum 60 leh a chunglam vaccine la dawng lo leh kum naupang, taksa lama harsatna nei/rualbanlote tan Covid vaccination centre siam a ni dawn.

Sorkar laipuiin he centre, "nearer to home" tia vuah siamna tura kaihhruainate tichhuakin, kum upa zawk leh rualbanloten awlsam zawka Covid-19 vaccine an lak theihna tura ruahman a nih thu health ministry chuan Ningani khan a sawi.

Vaccine la turten awl­­­sam taka an lak mai theih nan, an inlum hnaih theih ang bera community centre, resident welfare association centre, pan­chayat house, school, old age home-ah centre hi siam tura tih a ni.

Mihring cheng tam dan azirin district leh khawpuia task force-te chuan centre an buatsaih tur a ni a, ramchhung dinhmun thlir chungin vaccine khawhral tlem theih dan zawng zel tura tih an ni bawk.

Heng centre te hi Covid vaccination centre (CVC) nena inthlunzawm tura tih an ni. Vaccine semchhuah dan leh mihring chhawr tur chungchangah CVC chu mawhphurhna pek an ni bawk.

Kum upa leh rual­banlo, vaccine la turte hi finfiah an nih hnuah Co-WIN portal ah ziahluh vek tur an ni. Centre tinah member panga ; doctor, vaccinator, Co-WIN registration buaipui turin vaccination officer pakhat, vaccination officer dang pahnih bakah mipui pungkhawm enkawl tur midang pathum an awm ang. Vaccine lak zawha an taksa lama harsatna a awm loh nan minute 30 an ṭhukhawmuanga tur a ni a, hei hi assistant pakhat in a ṭhutchilh dawn a ni.