India rama hri lengin Covax vaccine supply a nghawng

World Health Organization (WHO), UNICEF, GAVI, the Vaccine Alliance leh Coalition for Epidemic Preparedness Innovations (CEPI) chuan thuchhuah inṭawm siamin, India rama Covid-19 hri leng hluar chuan COVAX vaccine supply thlengin a nghawng a, kumin June thla tawpa vaccine indaih lohna chu dose maktaduai 190 a tling thei dawn niin a sawi.

Thuchhuah an siamah hian vaccination programme kalpui ṭhatna ramah chuan hri kai pawh an tlahniam chho zel a, damdawi-ina indahluh ngai pawh an tlem chho a, nunphung pawh a pangngai chho leh ṭan niin an sawi. Hemi rual hian khawvel pum huapah erawh chuan hri leng dinhmun hi a la ṭha lo hle a ni, an ti.

India ramah hri leng a hluar chho leh nasa a, vaccine a thawnchhuah pawh titawpin, hei hian vaccine supply kawngah khawvel huapin nghawng a neih phah tih an sawi. Hemi rual hian vaccine siamtu hrang hrangte nena inremna an siam angin, kumin kumtawp lamah chuan vaccine tam tham tak neih theih an beisei tih an sawi nghal bawk.