PM CARES Fund : Covid-19 vanga nu leh pa chante ṭanpuina duang
Prime minister Narendra Modi chuan Inrinni khan naupang, Covid-19 vanga nu leh pa chante chu PM Cares For Children kaltlangin chhawmdawlna pek an ni dawn tih a puang.
PM hoa high-level meeting neihnaah hri lengin naupangte a nghawng dan thlirin, an tan chhawmdawlna siamsak hi an rel a ni.
PM CARES scheme hnuaiah hian Covid-19 vanga nu leh pa chan, naupang chu kum 18 a tlin hnuah Rs nuai 10 a dawn theihna tur specially designed scheme siam a ni. Kum 18-23 inkar, higher education an kalchhungin an mamawh lei nan thlatin stipend pek an ni dawn a, kum 23 an tlin hunah an eizawnna leh hmalam hun atan sum hi a hlawmin an la thei ang.
Sorkar chuan naupangte chu a thlawnin school a kaitir dawn a, "Kan ram hmabak chu naupang kutah a awm a, chuvang chuan kan theihtawp kan chhuahpui ang. Kan hna a ni a, ṭha taka enkawl leh an rilrua beiseina tuhsak zel hi kan tum a ni", tiin chawmdawlna an ruahman dante PM Modi chuan a sawi. Naupang ten zirna sang zawk an zawm dawnin education loan an laknaa interest awmte PM CARES chuan a peksak dawn a, kum 18 an tlin hma chuan Aysuhman Bharat hnuaiah health insurance tihsak an ni bawk ang.
Kum 10 hnuailam tana school kai dan tur
Covid-19 vanga nu leh pa chan, naupangte chu Kendriya Vidyalaya emaw mimal school hnaiberah day scholar-in admission tihsak an ni ang.
Mimal school-a admit an nihin, RTE norms angin PM CARES kaltlangin fee tumsak an ni ang.
PM CARES chuan an uniform, text book leh notebook a tumsak bawk ang.
Kum 11-18 inkar tana kalpui dan tur
Sorkar laipui hnuaia awm: Sainik school, Navodaya Vidyalaya etc. ah admission tihsak an ni ang. Naupang chu guardian/ pi leh pu/ chhungkhat laina hnai enkawlna hnuaia awm a nih chuan mimal school-ah day scholar emaw Kendriya Vidyalaya hnai berah admit an ni ang.
Mimal school-a admit an nihin, RTE norms angin PM CARES kaltlangin fee tumsak an ni ang.
PM CARES chuan an uniform, text book leh notebook a tumsak bawk ang.
Higher Education lama ṭanpuina turte
India ram chhunga Professional course / higher education kal chhunzawm duh tan education loan an lakna interest chu PM CARES kaltlangin rulh sak an ni ang.
Undergraduate / vocational courses an kal chhungin scholarship tlukpuiin heng tuition fees / course fees te chu sorkar laipui emaw state sorkar scheme hnuaiah emaw pek an ni ang.
Hripui vanga nu leh pa chan, naupangte pualin state hrang hrangten chhawmdawln an siam aṭangin heng fahrah naupangte puala PM CARES scheme siamna hi a lo piang a ni.