Sorkar laipuiin vaccine dose vbc 12 chuang pechhuak leh dawn

Union Ministry of Health and Family Welfare chuan June thlaa COVID-19 vaccination programme kalpuina turin sorkar laipui chuan vaccine vaibelchhe 12 a semchhuak dawn tih nimin khan a sawi.

"COVID-19 vaccine dose vaibelchhe 6.09 chu State leh UT-a Health Care Workers (HCWs), Front-Line Workers (FLWs) leh puitling kum 45 leh a chunglam tan a thlawnin sorkar laipuiin a sem chhuak dawn," tiin Union Health and Family Welfare chuan a puang.

Hei mai niloin, dose vaibelchhe 5.86 chuang chu state/UT leh mimal damdawi-in ten direct procurment hmangin an lei thei dawn bawk. Hengte nen hian June thla hian COVID vaccination programme hnuaiah dose vaibelchhe 12 dawn chu semchhuah theih a ni dawn a ni, a ti.

May thla chhung hian national COVID vaccination programme hnuaiah vaccine dose 7,94,05,200 pek a ni.

Ram pumah Pathianni zing thleng khan session 30,07,831 kaltlangin, Covid-19 vaccine dose vaibelchhe 21.20 semchhuah a ni tawh.

Sorkar laipui chuan vaccine thawnchhuah chungchang chu a hma thei ang bera hrilhlawk an nih tur thu leh, state tin hnenah vaccine daihzai taka sem a khawhral lo tura ruahmanna siam turin a chah.