Covid-19 Enkawl dam 90,000 chuang awm tawh
India ramah coronavirus hripui lengin ziaawm lam pan hlei thei lo mah se enkawl dam pawh an tam tawh hle a, nimin thleng khan mi 91,819 chu enkawl dam tawhin enkawl dam leh rate hi 47.76% a tling tawh.
Nimina Ministry of Health and Family Welfare report tihchhuah hma darkar 24 chhungin ram pumah enkawl dam 4,835 an awm a ni.
Ram pumah hrileng kai mi 1,90,535 an awm tawh a, kai hmuh chhuah thar 8,392 awm belh lehin hei hi ni khat hrikai hmuh chhuah thar tam ber ni a ni leh a, ni khata kai tam ber record hi nitin deuh thaw a thar a awm fo a, hrileng kai thar zat hi a tlahniam meuh lo.
Hri kai mek hi 93,322 an la awm a, thihpui 5,394 awm tawhin MoHFW report thar berah hian thihpui 230 an awm belh a ni.
State ṭhenkhat dinhmun
Hri kai tam berna state Maharashtra-ah chuan mi 67,655-in an kai tawh a, kai thar 2,487 awmin hri kai mek 36,040 an awm a, enkawl dam tawh 29,329 awmin darkar 24 chhungin mi 1,248 an enkawl dam hman. Thihpui 2,286 awm tawhin ni khat chhungin mi 89 an thih belh leh.
Tamil Nadu-ah chuan mi 22,333-in an kai tawh a, hri kai mek 9,403 awmin enkawl dam 12,757 lai an awm tawh a, darkar 24 chhungin mi 757 enkawl dam an awm. Thihpui 173 awm tawhin mi 13-in an thihpui leh a ni.
Delhi pawhin tlakhniam lam an pan thei lo a, 19,844 laiin kai tawhin case thar 1,295 a awm a, enkawl dam tawh 8,478 an awm laiin thihpui 473 an awm tawh thung.
Gujarat-ah pawh thihpui an pung zel a, Maharashtra tih lohah chuan thihpui tam ber state niin mi 1,038-in an thihpui tawh a ni. Covid-19 hri kai 16,779 awm tawhin enkawl dam 9,919 an awm ve tawh bawk a ni.