India ramah hri kai thar nuai 1.52 awm belh : Ni 50 hnua hri kai tlem ber ṭum thleng
India ramah coronavirus kai thar tla hniam zelin, Pathianni khan hri kai thar 1,52,734 hmuhchhuah niin, ni 50 liamta chhunga hri kai tlem ber ṭum a ni. Hemi ni vek hian Covid-19 vangin 3,128 an thih belh leh a ni.
Ministry of Health and Family Welfare-in nimin zing dar 8-a data a tihchhuahah Pathianni khan hri kai dama chhuahtir (discharge) 2,38,022 an awm. India rama hri kai hmuhchhuah tawh chu 2,80,47,534 niin, an zinga 3,29,100-in an thihpui tawh.
Indian Council of Medical Research (ICMR) chhinchhiah danin India rama vaccine semchhuah runpui, January 16-a kalpui a nih aṭang khan vaccine dose vaibelchhe 21.31 pekchhuah a ni tawh.
Nitina hri kai hmuh chhuah, positivity rate chu 8.02% ah tlahniamin, ni ruk chhung a zawnin 10% hnuailamah a tla thla tawh a ni.
Pathiannia hripui vanga thi zingah hian Maharastra (832), Karnataka (492), Tamil Nadu (486), Kerala (198), Uttar Pradesh (155), West Bengal (148), Punjab (125), Delhi (122) leh Andra Pradesh (104) an awm.
Ramchhunga coronavirus kai hmuhchhuah tlahniam zel karah state leh UT zingah; Haryana, Odisha, Telangana leh Sikkim-te chuan lockdown an pawtsei. Uttar Pradesh leh Jammu and Kashmir-a district ṭhenkhatah chuan hri kai an tlakhniam zel avangin khuahkhirhna hi thlahdul a ni thung. Khuahkhirhna thlahdul mah se zan curfew bakah kartawpa hnathawh khap a la ni bawk.
Kerala, Tamil Nadu, Maharastra leh Goa te chuan June thla chawlhkar hnih chhung chu lockdown/khuahkhirhna an kalpui chhunzawm dawn a; Delhi, Madhya Pradesh leh Himachal Pradesh-ah te chuan hri lengin ziaawm lam a pan zel avangin inthlahdul chhoh an tum thung.