Central Vista project thawh chhunzawm dawn : Delhi HC-in petition thehluttu pawisa chawi tir

Delhi High Court chuan nimin khan Central Vista redevelopment project thawh mek tihtawp tura ngenna, petition thehluh chu ngaihtuahin a hnawl a, petition thehluttute chu cheng nuai khat a chawitir zui bawk.

Ram pumin hri leng thawh hnihna thleng mek avanga harsatna nasa tak a tawk mek a, hri kaite enkawlna tur health facility leh damdawi hmanrua lamahte indaih lohna nasa tak an tawk mek a ni. Hetih laia sorkar laipuiin sum tam tak senna tur, Central Vista project a thawh mek chuan sawisel a hlawh hle a, eptu party hrang hrang pawhin project hi titawp rih a, he project atana sum ruahmante chu hri dona atana hmang tura an phut thu pawh an sawi fo a ni.

Delhi High Court-a petition thehluttute hi Anya Malhotra leh Sahail Hashmi an ni a, he project thawhnaah hian hnathawktu tam tak an awm avangin Covid-19 hri an kai leh, hri thehdarhtu an nih mai pawh a hlauhawm thu te an sawi.

Mahse Delhi Court chief justice DN Pastel leh justice Jyoti Singh awmna bench chuan petition a ngaihtuahnaah hna thawh chawl rih tura ngenna chu hnawlin, thawktute chu an hna thawhna hmunah hian an awm nghal a ni, a ti. Bench chuan Central Vista project chu 'essential national project' niin a sawi.

May thla tir lam khan sorkar laipui chaun Delhi High Court hnenah hian Central Vista project chungchanga petition thehluh chu dan palzutna leh he project dan tumna a ni tiin, petition chu hnawl tur leh sum pawh chawitir hial turin a lo ngen tawh a ni.

Court chuan project thawktu, Shapoorji Pallonji Group hnena contract pek angin kum 2021, November thlaah hna hi zo fel tura tih a ni a, hei vang hian a hun taka an zawh theihna turin hna an thawh chhunzawm zel phalsak a ngai a ni, a ti.