Ni 34 chhunga hri vanga thi tlem ber ni thleng : Ram pumah hri kai thar nuai 1.27 awm belh

India ram pumah Thawhṭanni khan Covid-19 hri vanga thi chu mi 3,000 tling loin ni 34 chhunga ni khata hripui vanga thi an tlem ber ṭum a ni. Hemi ni vek hian hri kai hmuh chhuah thar nuai 1.27 an awm belh leh bawk.

Thawhṭanni khan hripui vangin mi 2,795 an thi a, union health ministry data tarlan danin heng mite nen hian India ramah hri vanga thi mi 3,31,895 an tling tawh.

May thla kha India ramin hripui leng a tawrh nat ber ṭum niin, hemi thla hian khawvel ram zinga hri kai hmuhchhuah thar leh thihpui tamna ber ram a ni.

May thla chung hian Covid-19 vangin mi nuai 1.2 in nunna an chan a, April (48,768) nena tehkhin chuan May thlaa hri vanga thi hi a let hnih leh a chanve velin a tam zawk.

Ram puma hri kai tawh zawng zawng chu 2,81,75,044 an ni. Hri kai mek active case 18,95,520 awm in, ni 43 hnuah nuai 20 hnuai lamah a tla thla a ni.

Test aṭanga hri kai hmuh chhuah, positivity rate chu 6.62% ah tla thlain, a zawnin ni sarih chhung 10% hnuai lamah a awm tawh a, kartina positivity rate pawh 8.64% ah a tlat hla tawh a ni.

Ni 19 chhung chu a zawnin hri kai thar aiin dama chhuahtir an tam tawh bawk. Thawṭannia dama chhuahtir chu mi 2,55,287 an nih thu ministry chuan a sawi. India rama hri kai dam tawh chu mi 2,59,47,629 niin, recovery rate chu 92.09% a ni mek.