Doctor-ten Baba Ramdev laka lungawilohna lantir : FORDA-in ram pumah 'black day' an hmang
Federation of Resident Doctors Association (FORDA) India chuan Yoga Guru Ramdev-a'n allopathic doctor leh modern medicine a sawichhiat avangin nimin khan rampum huapin lungawilohna an lantir.
Social media site hrang hrangah Ramdev-a'n modern allopathy chungchang "thil mawlmang leh science lama hlawhchhamna" tia sawi a darh avangin he buaina hi a lo inṭan a ni.
FORDA India chuan Inrinni khan ram pumah Ramdev-an Covid dona kawnga thawktu leh modern medicine mawilo taka a puhna an duh loh zia lantirnan an lungawiloh nate auchhuahpuiin, damlo te tana buaina thlenlo thei tur ang berin black day protest an kalpui tur hi an lo puang tawh a ni. Ramdev hian a thusawi chungchangah vantlang hmaa ngaihdam a dil loh chuan Epidemic Diseases Act bawhchhiat avanga hrem theih a nih thu association chuan a tarlang bawk.
Doctors Association Jammu (DAJ) chuan nimin vek khan Ramdev-a'n pawisak nei lo taka thu a sawi avangin lungawilohna an lantir ve bawk a ni.
DAJ chuan Jammu and Kashmir lieutenant governor Manoj Sinha hnenah Ramdev chunga hma la tura ngenin, pawisak neilo leh hmusit taka a ṭawngkhum man chu a chawi ngei tur a ni tiin an thuchhuahah an tarlang. Covid-19 leng karah damlo te tana phurrit siamsak lo zawngin lungawilohna hi kalpuiin, lungawilohna lantirna kal zelah doctor te chuan an banah bandage dum an hreng dawn a ni.
Indian Medical Association (IMA) chuan kar liam ta Nilaini khan prime minister Narendra Modi hnenah Covid vaccine semchhuah chungchangah thuthang dik lo a lo thehdarh avangin Ramdev lakah action la tura ngenna an thlen tawh bawk.
IMA hian yoga guru Baba Ramdev chu allopathy leh scientific damdawi tihmingchhe zawnga thu a thehdarh avangin legal notice an pe. Mahse Patanjali Yogpeeth Trust chuan Ramdev thlavang hauhin, video-ah hian Ramdev hian WhatsaApp forwarded message a chiar chhuak ringawt a, hei hi social media lamah a darh ta niin a sawi thung.
May 23 khan Ramdev chuan allopathic damdawi chungchanga thusawi dan avangin union health minister Dr Harsh Vardhan hnen aṭanga khakna lehkha a dawn hnuah, a thu lo sawi tawh hi a sut leh a ni.
Minister hnenah hian lehkha thawn letin Ramdev chuan,"Modern medical science leh allopathy hi kan do lo. Allopathy hian nunna tam tak alo chhanhim tawh a, mihring tan pawhin a ṭangkai hle a ni. Volunteer ho hmaa Whatsapp message ka dawn ka chhiar chhuah chu ka thusawi anga sawi zui a ni ta zawk a ni. Mi rilru ka lo ti na a nih chuan ngaihdam ka dil e," tiin a ziak.