Covid-19 darh chhanah Namaste Trump puh
Shiv Sena hruaitu Sanjay Raut chuan an party chanchinbu, 'Saamana'-ah Gujarat, Mumbai leh Delhi-a Covid-19 a darhna chhanah sorkar laipuiin US president Donald Trump lo lawmna atana Ahmedabad-a 'Namaste Trump' inkhawm a buatsaih chu a puh.
Rault chuan Gujarat-a hri a darh zualna chhan chu President Donald Trump lo lawmna tura mipui punkhawmna lian tak buatsaih a nih avang a ni, a ti. Trump-a rawn ṭawiawmtu official-te chuan Mumbai leh Delhi-te an tlawh bawk a, hei hian hri hi a tidarh bawk a ni, a ti.
February 24 khan Ahmedabad-ah President Trump lawmna inkhawm hi buatsaih a ni a, mi sing tel an tel a ni. Road show neih hnuah PM Modi leh President Trump-te chuan Motera cricket stadium-ah mi nuai khat chuang pungkhawm hmaah thu an sawi a ni.
Shiv Sena MP Raut chuan sorkar laipui chu ruahmanna fel tak nei loa lockdown puangah a puh bawk a, tuna lockdown hlih chungchangah state-te chu mawh a phurh tir leh si a ni, a ti.