Covid-19 Thihpui zinga 53% March 1, 2021 hnu lama thi an ni

India ram pumah Thawhlehni thleng khan Covid-19 hri vanga thi mi 3,35,102 an awm tawh a, an zinga 53% hi kumin March 1 hnu lama thi an ni a, May thla bikah 37% an awm.

Nimina union health ministry official data tarlan danin, ram puma hri kai hmuhchhuah tawh, mi 2,83,07,832 zinga 60% chuang chu March 1 hnu lama hmuhchhuah an ni bawk. Ram puma hri leng thawh hnihna a thlen hnuah, March 1 hnu lama hripui vanga thi hi nuai 1.74 awm tawhin, hri kai thar pawh vaibelchhe 1.70 an awm hman tawh a ni.

May thla bikah hri kai hmuh chhuah nuai 94.12 leh thihpui nuai 1.23 an awm. April thla khan ram pumah Covid-19 kai hmuh chhuah thar nuai 64.81 awmin, thihpui 45,862 an awm. April thla aiin May thlaa hri kai hi 43% in an pung a, thihpui punna pawh 163% a tling.

May thla chanve hmalam khan hri kai pun zual lai niin, hri kai thar tam ber ni record a thleng fo. Mahse thla chanve hnu lamah erawh hri kai hi an thlahniam chho ta a ni.

India rama hri leng thawh hnihna a thlen hnuah April 15 aṭang khan ni khata hri kai thar hmuh zat hi nuai hnih an chuang chho a, April 22-ah ni khatah nuai thum chuang awm chho lehin May 16 thlengin a tlahniam thei lo a ni. Mahse May 17-ah hri kai thar nuai 2.81-ah a tlahniam a, hun eng emaw chen nuai thum hnuai lam zelah awmin, May 28 aṭang khan nuai hnih hnuai lamah a tla thla leh bawk.

Ni khata hripui vanga thi zat pawh a tlahniam ve zel a, a peak aṭangin a tlakhniamna hi 38% chuang a ni tawh. May 19 khan hri vangin mi 4,529 an thi a, hei hi India ram chauh ni lo khawvel pumah ram pakhata Covid-19 hri vanga ni khata thi an tam ber ni a ni. Mahse Thawhlehni khan thihpui zat hi 2,795-ah tla thla tawhin, ni 35 chhunga hri vanga thi an tlem ber ni a thleng.

Covid-19 vanga India rama thi hmasa ber chu nikum March 12-a thleng a ni,.Kum 2020 October 2-ah thi zat hi nuai khat tling chhoin, kumin April 28 khan mi nuai hnih an tling leh a, May 24-ah nuai thum an tling leh hman a ni.

Hri vanga thi awm hmasak ber aṭanga thla sarih chhungin mi nuai khatin an thihpui a, thla sarih vel hnuah nuai hnihah an tling chho a ni. Hetih lai hian nuai hnih aṭang nuai thum tlin nan hian ni 27 chiah hun a duh thung.

Ram puma hri kai mek, active case nuai 18.95 awm mekin, an tam ber ṭum chu May 10 kha niin hemi nia India rama active case awm zat chu nuai 37.45 a tling. Ni 43 hnuah active case hi nuai 20 hnuai lamah a awm tawh a, hri kai hmuh chhuah tawh aṭangin tuna hri kai mek hi 6.73% an ni.