Hri leng thawh hnihnaah doctor 594 an thi tawh

Indian Medical Asso­ciation (IMA) chuan ramchhunga Covid-19 hri leng thawh hnihna thleng mekah doctor 594 an thi tawh tih a sawi. India rama state leh UT zingah Delhi-ah doctor thi tam berin, mi 107 an thi tawh a ni.

IMA in state-te data a lakkhawm aṭangin, hri leng thawh hnihna chhunga doctor thi te chu Delhi, Bihar leh Uttar Pradesh huamchhunga mi te deuh vek an nih thu a sawi. Doctor thi zinga 45% vel chu state pathuma mite hi an ni.

Nikum aṭanga ram chhunga Covid-19 hri a len aṭangin, hri dona kawnga hmatawnga ṭang doctor 1,300 vel an thi tawh tih IMA chuan a tarlang.

IMA hian union home minister Amit Shah hnenah lehkha thawnin, damdawi-in lama thawkte laka tharum thawhna thleng ṭhin tihtawpna tur dan khauh tak siam turin an ngen. Assam-a doctor pakhat Dr Seuj Kumar chu Covid-19 hri kai damlo a thih avangin mitthi chhungten rawng takin an sawisak thu IMA chuan an sawi chhuak a, ram chhunga damdawi lama thawktute himna tur ngaihtuah a, an hmakua ngaihtuah pui turin an ngen a ni.

IMA chuan damlo enkawltute chunga kut inthlakna te chu chhan ṭha tak an neih pawhin ti tawh lo turin an duh tih an sawi. Damdawi-ina thawktute laka kutthlakna hi tunhnai hian hluar chho hle in, damdawi lam zir mite chungah hlauhthawnna a thlen phah nasa tih an sawi.

"Ramchhungah dam­dawi lama thawktu chungah tharum thawhna a thleng fo ṭhin. Doctor leh healthcare staff-te chuan hetiang boruak kara hnathawh hi harsa an ti hle. India hian damdawi-in lama thawktu te chungah hriatthiamna, intluktlanna leh dan khauh tak, an mahni venhimna tur a mamawh a ni" tiin IMA chuan Assam rama thilthleng chungchanga buaina awmah action khauh tak la turin a ngen.

IMA hian Assam sorkar hnenah an state a doctor beihna vangin damdawi-in te chu protective zone a puang turin an phut bawk.