Covid-19 thawh thumnain ni 98 thleng awh thei, Hri leng thawh hnihna tlukin a na dawn : SBI report

Covid-19 hrileng thawh thumna lo thleng tura rinlawk mek chu a thawh hnihna tluk zetin a na thei dawn tih SBI report chuan a sawi. Mahse vaccine semchhuah ṭhat a nih chuan Covid kaihhnawiha thihna thleng tur tam tak chhanhim theih a nih tur thu a tarlang bawk.

SBI report chuan hri leng thawh hnihna hian ni 108 vel a awh laiin a thumna hi ram changkangah chuan ni 98 vel a awh dawn niin a sawi. Hemi atan hian oxygen, ICU khum leh hri kai enkawlna lamah inpuahchahna ṭha a awm chuan, hri leng thawh thumna chhung hian thi an tlem zawk thei niin SBI Ecowrap report chuan a sawi.

Hri leng thawh thumna chhunga hri kai na zual hi 20% aṭanga 5%-a a tlakhniam theih chuan tun dinhmuna hri vanga thi awm nuai 17 aṭangin mi 40,000 dawnin thi an tlem zawk thei dawn niin report chuan a tarlang.

Naupangte chu hri leng thawh thumna tuar na thei tur(vulnerable group)an nih avangin fimkhur tura chahin, vaccine semchhuah chu hna hmasaa neih a ṭul takzet tih a sawi. "Naupang maktaduai 150-170, kum 12 aṭanga kum 18 inkar tan, ram dang tihdan entawnin India chuan an tana ruahmanna a siam lawk a ṭul " tiin report chuan a sawi.

NITI Aayog member (Health) VK Paul chuan hri leng mek hi naupang lamin la tuar nasa lutuk lo mah se, hri inthlak danglam zel chuan nghawng na zawk ala nei thei a ni tiin,hemi atana theihtawpa an inbuatsaih lawk mek a nih thu a sawi bawk.

India ramah Nilaini khan hri kai thar 1,32,788 awm belh lehin, hri kai hmuhchhuah tawh zawng zawng chu 2,83,07,832 an ni. Positivity rate erawh 6.57% ah a tlak thlak tawh thu Union Health Ministry chuan a tarlang.

Hri kai hmuhchhuah chu May 7 aṭang khan nitin a tlahniam ve zel a, Covid-19 kai tam lai ber nena tehkhin chuan 69% in a tlahniam tawh tih a sawi. Hri kai mek, active case pawh nuai 18.95 ah tlahniam tawhin, May 10 hnuah nuai 18 zetin a tlahniam bawk a ni.

Hri leng thawh hnihna chuan ziaawm lam a pan zel tawh a, sorkar chuan district level-a containment huamchhungah chak zawka test kalpui zel anih thu a sawi.

State hrang hrangah vaccine indaih tawk lohna thleng mek mah se, sorkar laipui chuan July thla laihawl emaw, August thla tir lamah emaw chuan nitin vaccine dose vaibelchhe khat semchhuah hman tum a ni tih a sawi. December-ah chuan ram mipui zawng zawng daih khawp vaccine an semchhuah hman an beisei thu ICMR director-general Dr Balram Bhargava chuan a sawi.