Hri kai thar nuai 1.32 awm belh leh

India ramah Ningani khan Covid-19 hri kai thar nuai 1.32 awm belh lehin, hri kai hmuhchhuah tawh zawng zawng chu vaibelchhe 2.85 an tling tawh a ni. Ramchhungah chanchin lawmawm awm belh zelin, ni 11 chhung chu a zawnin positive rate 10% hnuai lamah a tla tawh. Hri kai mek, active case pawh nuai 16.35 ah a tlahniam tawh bawk.

Maharashtra state-ah coronavirus kai hmuhchhuah thar 15,229 awm lehin,hri leng tuar na ber state a ni a, hri kai tawh nuai 57.91 an awm a ni. Khuahkhirhna siam pawh thlahdul ṭan a tum a, April thlaa Covid-19 laka kaihhruaina a siam tawhte chu thlak turin ruahmanna kalpui mek a ni.

Maharashtra dawtah Karnataka, Kerala, Tamil Nadu leh Andhra Pradesh chu hri kai hmuhchhuah tam zualna state an ni. Karnataka-ah hri kai thar 18,324 hmuhchhuah awmin, kar khat chhung state shutdown pawhsei a ni a, June 14 zing kar thleng a awh ang. State chhungah hri kai mek nuai 2.86 an awm.

Kerala-ah pawh Ningani khan hri kai thar 18,853 an awm belh. Hemi ni vek hian mi 153 an thi bawk a, hri vanga thi hi 9,375 an tling tawh a ni.Tamil Nadu-ah a zawnin ni 13 hri kai thar an pun belh tawh a, hri kai thar 24,405 awmin, heng zinga 2,062 chu Chennai aṭanga hmuhchhuah an ni.

Delhi-ah Ningani khan Covid kai hmuhchhuah 487 awmin, mi 45 an thi. Thla hnih leh a chanve hnua hri kai thar an tlem ber ṭum a ni. Positivity rate chu 0.61% a ni tawh bawk. India rama mipui tam berna state, Uttar Pradesh-ah hri kai hmuhchhuah 1,220 awmin, mi 108 Covid vangin an thi.

India-in vaccine semchhuah runpui a kalpui aṭangin dose vaibelchhe 22.41 semchhuah tawh a ni. Hetihlai hian vaccine indaihlohna vangin state eng emaw zatin harsatna an tawk mek a ni.