MP-ah junior doctor 3,000 dawnin banna thehlut

Madhya Pradesh-a sorkar medical college paruka thawk, junior doctor 3,000 dawn chuan Ningani khan an college dean ṭheuh hnenah banna an thehlut.

Junior doctor-te hian sorkar lakah thil eng emaw zat phutin Thawhṭanni aṭang khan nawrh an huaihawt a ni. An thil phut zingah hian an stipend tihpun leh, anmahni leh an chhungten Covid-19 an kai a nih chuan a thlawna enkawl tura an phutna pawh a tel.

Madhya Pradesh Junior Doctors Association (MPJDA) president Dr Arvind Meena chuan May 6 khan state sorkar chuan an thil phut tihhlawtlin hi a lo tiam tawh a, mahse tun thlengin hma lak chhunzawmna a nei leh lo tih a sawi.

Ningani khan Madhya Pradesh High Court chuan doctor-te nawrh huaihawt chu dan kalh a ni tiin, an nawrh titawp a, darkar 24 chhung ngeia an hna thawk chhunzawm turin a ti a, mahse hei hi doctor-te hian chuan zawm duh loin banna an thehlut ta zawk a ni.

Dr Meena chuan HC thupek chungchang hi Supreme Court-ah thlen an tum tih a sawi.