Kerala sorkarin Covid package Rs vbc 20,000 siam

Covid-19 hri leng thawh hnihnain chhiatna leh harsatna hrang hrang a thlen mekah, an harsatna tawhte chhawk zangkhaina leh hri leng dona turin Kerala sorkar chuan Covid package cheng vaibelchhe 20,000 a siam.

State finance minister KN Balagopal chuan nimin khan budget hi pharhin, financial package bakah hian an state-a kum 18 chunglamte hnenah a thlawna vaccine pek vek an nih theihna turin Rs vbc 1,000 ruahman a ni tih a sawi. Vaccine sem nana hmanraw pawimawh leina atan vaibelchhe 500 dah hran a ni bawk.

Finance minister chuan CM Pinarayai Vijayan kaihhruai sorkar hmasa khan hri leng dona atan Rs vbc 20,000 a lo dah tawh bawk a, hei hi ṭangkai taka hman a ni tih sawiin, "A tum hnihna atan Rs vbc 20,000 bawk Covid-19 package ah a dah leh ta a ni," a ti.

Budget thar hnuaiah hian mitinten hriselna ṭha an neih a, ei tur an neih vek theihna tur leh, hri lengin nghawng a neihte tihziaawm a, an state-a hri leng thawh thumna a thlen lohna tura hma lakna chu ngaihpawimawh a nih thu minister chuan a sawi. Hri leng thawh thumna lo thleng thulha ngaihtuahna sen a ṭul thu leh state chhunga health emergency an tawh mekin harsatna a thlen dante chu ngaihtuah tham a nih thu a sawi bawk.

Budget-ah tuilian leh ruah sur nasa avanga harsatna takte chhawmdawlna tur revival package siam tel a ni bawk a ni.