Thla 2 hnua hri kai hmuhchhuah tlem ber ṭum thleng

India ramah Inrinni liam ta khan hri kai nuai 1.14 hmuhchhuah thar awmin, mi 2,667 an thih belh. Ramchhunga hri kai hmuhchhuah tawh chu vaibelchhe 2.88 an ni a, thihpui nuai 3.64 an awm tawh tih health ministry chuan a sawi.

Hri kai mek chu nuai 14.77 ah an tla thla a, dama chhuahtir hi Inrinni khan nuai 1.89 an awm. Ni 24 chhung chu a zawnin hri kai thar aiin dama chhuahtir an tam tawh a ni.

Inrinni khan sample nuai 20 vel test a ni leh a, test tawh belhkhawm chu 36,47,46,522 an ni. Test neih aṭanga hri kai hmuh chhuah, positive rate chu 5.62% ah tla hniam zelin, 10% hnuailamah ni 13 chhung a awm tawh.

Maharashtra-ah hri kai 13,659 awm belhin, hri kai hmuhchhuah tawh nuai 58.19 an awm tawh a, ramchhunga hri leng tuar na ber state a nih chhunzawm zel. Recovery rate 95.01% niin, fatality rate 1.71% ah a tla thla.

Maharashtra dawtah, Karna­taka, Kerala, Tamil Nadu, Andra Pradesh leh Uttar Pradesh-te chu hri leng hluar zualna te an ni.

Tamil Nadu sorkar chuan Covid-19 lockdown chu kar khat chhung a pawtsei leh a, hotspot district 11 tan khuahkhirhna siamin, a bak zawng district tan khuahkhirhna a thlahdul thung. Thawhṭanni thlenga lockdown kalpui tura tih chu, June 14 thleng pawhsei a ni.

Delhi-ah Covid-19 kai thar 414 awmin, March 15 hnua hmuhchhuah tlem ber ṭum a ni. Chief minister Arvind Kejriwal chuan khawpuia market leh shopping mall te chu ni kar thlaka hawn phalsak an ni dawn tih a sawi.

India ramah vaccine dose vaibelchhe 23 semchhuah a ni tawh a, vaccine indaihlohna vangin state-ten harsatna an tawk mek a ni. Hetihlai hian sorkar laipui chuan Liberalised Vaccine Policy chu a thlavang a la hauh zel a, May 1-a he policy hman a nih aṭang khan state tam takte harsatna sutkian a nih thu a sawi. Dose dik lo taka semchhuah a nih chungchanga thuthang awmte chu rintlak loh leh ngaihruatna mai mai a nih thu ministry chuan a sawi.

Haryana sorkar chuan In­rin­ni khan Malta-a company pakhat hnen aṭangin Russia vaccine Sputnik V lakluh tumin a ngaihven mek. Foreign company chuan dose khat Rs 1,120 zela hralh a tum niin an thuchhuahah an tarlang.

India ramah nikum August 7 khan Covid-19 kai hmuhchhuah chuan nuai 20 a pel chho a, August 23-ah nuai 30, September 5-ah nuai 40, September 16-ah nuai 50 an tling tawh a, September 28-ah nuai 60, October 11-ah nuai 70, October 29-ah nuai 80, November 20-ah nuai 90 leh December 19 khan vaibelchhe khat an tling a ni. Kumin May 4 khan hri kai hmuhchhuah hian vaibelchhe hnih an pel leh a ni.